Immigration i talem se oli stap wet long ol tender pepa blong statem proses blong niu software passport system.
Director blong Vanuatu Immigrations Services, Jeffrey Markson i bin talem long Septemba se Vanuatu bae i rere long wan software system long six manis taem.
“Bae DA(District Attorney) i stap komplitim ol dokumen(pepa) mo bae yumi mekem wan open sos tender; So mifala bae i invaetem ol kampani we oli save provaedem ol software ia blong oli kam foret,” Mr Markson i talem.
“Long hemia nao bae yumi save wok long passport system blong yumi. Eni kampani we i winim awod bae yumi givim hem taem blong wok long system. Mbe yumi kat ol passport buklet we i stap we yumi stap print vinis mbe onli tink we i jip we i stap insaed long buk ia hemi no inkludum ol data yet so taem software i kam in bae yumi jes inkludum.”
Mr Markson i talem se Vanuatu i mitim rikwamen blong International Civil Aviation Organisation blong tekem certificate blong public mo private key blong yusum database.
“Hemia hemi wan gudfala stat from yumi rijista vinis long ol rikwamen blong ICAO(International Civil Aviation Organisation); So taem niufala kampani ia hemi kam in, hemi kam blong instalem system nomo mo hemi helpem yumi long hao blong ranem evri program.
“So yumi stap luk se nekis yia bae yumi stat wok long program ia. Hemi dipen long proses blong yumi wetem finans.
Taem pipol oli wet blong usum niufala softwea, oli save rikwestem Certificate blong Identity olsem subsitute dokumen sapos oli nid blong travel hariap.
“Software we yumi yusum ia yumi karem bak long 2009 mo afta 10 yia yumi stil yusum. Pipol sapos oli lukluk gud yumi askem nomo birth certificate wetem foto ale yumi scanem putum long system be i kasem wan steij we hemi nomo wok kwik. So yumi mas apgredem. Dipatmen i toktok long man we i developem system ia be hemi nomo save apgred bae yumi nid blong karemaot mo putum long wan niu wan. Hemia from bae i kostem bigfala mani sapos yumi wok lem bakegen,” Mr Markson i talem aot.
Plante lokol i stil komplen long pua seves mo stap askem wetaem bae oli tekem niu passport blong olgeta.
By Agnes Herbert.
