Sunday, April 14, 2024
28.8 C
Port-Vila
Sunday, April 14, 2024
More

    Suicide kes

    Polis i rikodem faev kes blong suicide o fasin we man i tekem aot laef blong hem wan sins April 2023.

    Child mo Adolescent Mental Ofisa long Vila Central Hospital, Norah Simon i talem se mein fakta we i stap mekem isu ia hemi from pua parenting.

    Mrs Simon i talem se mein krup hemi 15 yia i ko antap from ol parent oli nomo stap spendem taem wetem ol pikinini blong olgeta olsem fastaem.

    “Ol famili oli talem nomo se hemi stap werem longhand klos mo bae mi askem se yu save leftemap klos blong yu afta bae yu luk nomo i kat scar long hand blong hem so bae storian blong mifala i mas ko blong askem se wanem nao i mekem yu mas mekem kil long yu wan, drink tablet o kakae nail blong yu olsem. So oli ko hed blong mekem olsem from i nogat wan yangfala i save storian wetem olgeta blong faenem wan wei aot, olgeta bae oli ko moa blong karemaot laef blong olgeta wan,” Mrs Simon i talem.

    Wan long ol yut we i stap traem blong karem aot laef blong hem i toktok wetem VBTC Nius mo i talem se hemi no filim love long hom blong hem mekem i stap wantem tekem aot laef blong hem.

    “Mi traem blong komitim suicide plante taem from ol situasen long haos we mi stap ko tru long hem mo afta mi nogat wan gudfala man blo mi blong talem mo hemi jes nosave wanem nao mi stap ko tru long hem so oli no helpful so las hop hemi blong mi ded,” Hemi talem.

    Wan komuniti lida long Erakor vilij, Jif Kalsaur Kalomtak Bomal 8 i talem se fes tijing blong ol pikinini hemi stat long hom.

    “Taem yu longwe long Papa God, bambae i kat wan samting bambae hemi hapen; Yumi no mas trastem wan man long Wol, Papa God nomo yu mas trastem hem from hemia nao i prioriti, Papa God i mas feswan mo laswan so taem yumi arem yumi long Pele bae oli tekem jej long Sunday las wik, mbe oli no kam from oli se wan yangfala i hangem nek. Long Friday mifala i stap long Jifs Nakamal blong oli putum fes post mbe oli se wan yangfala long Santo i hangem nek, taem yumi harem ol insiden olsem i stap hapen, tijing long hom hemi prioriti afta bae yumi save se yumi stap long wan komuniti we i kat pis, unity, rispek, obedience mo i kat humbleness,” Mrs Simon i talem.

    Mrs Simon i talem se wan man o woman we i komitim suicide o hemi stap traem blong kilim hem wan i ded hemi olsem se i stap krae kwaet nomo from help.

    Polis i askem ol komuniti lida blong luksave wanem i stap hapen; Ol jif, elder, pastor, ol woman mo yut lida mo ol parents blong helpem ol pipol we oli stap long nid.

    Ol rikod blong suicide ia Polis Serious Crime Unit i rikodem.

    by Patience Mawa.

     

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen