Shefa mo Tafea i save tekem ol strong hurricane wind blong Tropikol Saeklon Judy from i save inkris i ko long Category 3.
Principal Scientific Ofisa long Meteo Ofis, Jerry Timothy i talemaot long VBTC Nius tete eli moning se Saeklon ia i save kasem Shefa taem ples i delaet (mid moning).
“Tropikol Saeklon woning senta yumi stil kipim saeklon ia long category 2 mbe pawa blong hem hemi inkris(ko antap) mo likeli blong kasem yumi(Efate) long category 3; So taem yumi talem olsem i minim se taem hemi stap long category 2 yumi expektem gale fos mo ol storm fos wind nomo mbe taem pawa i inkris i minim se bae yumi kat ol hurricane fos wind so sapos prediksen ia hemi raet mo hemi kam kolosap long Shefa mo ko long Tafea i minim se bae yumi save kasem sam strong wind we i strong lelbet so pipol i mas rere,” Mr Timothy i talem.
“So hemia nao hemi forecast trak we yumi stap luk naoia blong Shefa mo Tafea.
“Lates finding i soem se Judy hemi stap long 1 namba 6 long Vanuatu Tropikol Saeklon Map long aelan blong Saot Pentecost mo East Ambrym. So yumi expek blong hemi ko hed long direksen blong Saot. Mo bae hemi turn lelbet long Saot East direksen. Yumi olbaot long Sherpherds i kam long yumi long Port Vila ia long Efate bae yumi expektem saeklon ia long moning long samples long 11’o klok long dei mo long semdei long tete ia bae i kasem saot long Tafea provins long 11 0’klok long naet mo hemi muv aot long ol aelan blong yumi long Vanuatu.”
Epi aelan i stap experiensem naoia strong win mo evi Rain.
VBTC Nius i toktok wetem Tousul Basil stret long Vermaul eria Kaonsel long vilIj blong Rovoliou Bay mo hemi konfemem.
