Wan parent mo lida blong comuniti blong Malekula, hemi givim kol long Gavman, Tijing Seves Comisen mo Vanuatu Tija Union blong mas faenem wan solusen hariap.

Hemi gat fulap samting we i stap kohed yet, long saed blong olgeta isu blong ol tija wetem gavman.

I mekem se i gat wan parent konsen mo wan lida blong wan komuniti long Malekula, Cliffson Shadrack, hemi bin toktok long VBTC Nius blong givim ol konsen blong hem abaot Tijing Sevis Commisen, Vanuatu Tija Union mo gavman.

Mr Shadrack, hemi bin talem se wetem wanem we hemi stap happen, Tijing sevis comisen hemi mas gat wan open maen blong tingbaot olgeta clem we olgeta tija oli gat.

Hemi bin talem se from i bin gat fulap suspensen, hemi gat wan bigfala impak long olgeta studen long kaontri.

Hemi bin toktok smol tu long saed blong olgeta tija we TSC hemi bin employem mo hemi talem se hemi lukim se sam i nogat enaf experiens.

Hemi bin kol i ko long VTU tu blong talem se taem we evri paymen hemi kam, isu i shud finis ya nao.

Mr Shadrack hemi stap, hemi bin kol i ko long gavman blong mas tingbaot gud, impotens blong edukasen.

Hemi urgem se i gat sam jenjes bae mas happen, long tijing sevis act.

Cliffson Shadrack hemi kol i ko long ol narafala parens raon long kaontri blong oli mas resem vois blong ol, blong oli save endem isu ya quik taem.