Vaccination long Convention Senta hemi stil on mbe wetem limit staff.

Shefa Public Health Manager, Obed Manwo, i konfemem wetem VBTC Nius.

Mr Manwo i talem se Pango mo Imere health senta i stap on hold from sam health wokman i kasem COVID.

“Mifala i stap redi nao blong fokas long Epi mo Sherpherds mbe mifala i nid blong testem ol staff blong mifala blong oli ko long self isolation mo stap redi mbe sam hao mifala i faenem aot se sam voluntia mo ol nurse blong yumi i test positive,” Mr Manwo i talem.

“Ova long 10 staff blong yumi oli positive. I mekem se mifala i mas muvum aot olgeta i ko stap aot blong oli save oraet blong yumi sendem olgeta i ko long Epi mo Sherpherds once yumi kliarem aot olgeta.  Mbe i kat tu mobile tim we i stap ko raon long ol komuniti blong yumi long Saot Efate blong mekem test. I kat ova 12 voluntia oli help long Convention senta wetem pat long ol mobile tim long Port Vila.

“Yumi nao i stap provaedem ol voluntia i ko help long Pango mo Imere health senta long Mele. Be naoia oli positiv i mekem se yumi klosem tufala health senta ia blong smol taem.”

Mr Manwo i talem se vaccination blong Epi mo Sherpherds hemi dilei from ol health wokman ia i sik.

“Sapos fo o seven dei oli klia ten yumi redi blong muvum aot olgeta,” Mr Manwo i talem.

“Mo long las wik kasem wik ia, mifala i jes kliarem olgeta nomo long Takuare. Olgeta tu oli postiv

Mr Manwo i talem se Saupia Health Senta i opereit ful wan nomo wetem ol stik mo COVID test.

“Saupia long Not Efate oli kat own voluntia blong olgeta,” Mr Manwo i talem.

I kat ova 30 Shefa Pablik Health staff we oli help aot long COVID naoia. I kat ova 12 voluntia. Mo 15 health wokman we oli kam long provins blong help.

VBTC Nius i kasem toksave se i kat tri health woka nomo i stik long Convention senta. Wan i stik mo tu i mekem konsaltesen; hemi taem patient i kam pas mo givim signature blong hem bifo save stik.