Pipol i mas keaful long ol fish mo shell long solwota from volcanic acid.
Scientific Ofisa long Geo Hazards Dipatmen, i talem long VBTC Nius se seismic aktiviti blong East Epi andawota volcano i stap ko hed taem Seismic station long Ambrym wetem Lopevi i soem.
“Yumi muv aot long ol eria long east ia, Ol pipol long komuniti we oli stap tekem ol fish mo shell blong keaful from volcano i ko hed blong givim aot ash mo gas i kamaot bae i kat acid blong volcano i stap long hem. Yumi kipim long 10 kilomita radius blong volcano.
“Ol man i mas stap alert so sapos hemi ko kwaet bae yumi apdeit bakegen.
“Taem hemi bin erap bigwan long stat blong January ia, gas hemi bin kamaot bigwan long eria blong saot east, i no kat eni denja long eni eria blong epi, wind i blo gas i ko long solwota mo plante long ol ol gas ia i kamaot i ko long dip sea so denja i nogat long saed blong acid ren.
“Mbe sapos eni steam i kamaot bae yumi apdeit lem bakeken.”
Hemi talem se level alert blong volcano i stil stap long 1.
“Ol lokol i stap luk ol steam i kamaot long ples we volcano i kamaot long hem lastaem so yumi ko hed blong monitarem situasen ia; Seismic activiti i soem se hemi ko hed. Yumi luk hemia long ol seismic station blong yumi long Ambrym wetem Lopevi so station we i daon i stap opereit naoia.
“Yumi stil kipim i stap long level 1 long minor unrest stage.”
