Shefa Port Vila Public Land Transport Association (SPLTA) hemi raetem wan leta long namba 3 Disemba 2024, igo long ol otoriti blong oli saenem niufala Tariff Strakja folem resolution blong anual jenerol miting blong olgeta weh i tekem ples long Friday las wik.
Mr Donald Massing, Presiden blong Association, i talem se, “Hemi no long busfare nomo, beh hemi long ol price blong evri katogori blong transport olsem taxi, tours, common transport, we oli stap insaed long PLT Act.” Hem i talem tu se ol price i mas go antap blong sapotem ol operator long transport mo blong no spolem ol bisnisman.
Association hemi givim wan manis long ol otoriti blong kivim wan ansa long request blong olgeta. Sapos oli no kivim ansa afta long wan manis, bae oli stop wok, from ol pablik operators oli no gat wan Tariff strakja weh Law hemi luksave.
Niufala Tariff stakja ia hem wan problem weh association hemi bin stap wok long hem blong fulap yia finis mo i stap naoia long stage weh i nidim ol otorites nomo blong saenem.
Disisen blong ansarem request ya hemi stap long Caretaker Minista blong Internal Affairs, Andrew Napuat, we i stap aotsaed long kantri long wik ya.
