Wetem hae praes blong elektrisiti, wan man hemi disaed blong ko fulwan long yus blong solar system.
Ed McGuire hemi spendem 19 yia long Vanuatu. Hemi bin spendem ova long VT30,000 evri manis long elektrisiti. Mbe naoia expense blong elektrisiti i go daon kasem zero vatu, from hemi dipen long sola system nomo.
Hemi namba tu yia nao we yang Australian ia hemi ranem evri aplaens mo tul long haus blong hem tru long sola pawa nomo.
Hae cost blong elektrisiti long kaontri tete, i fosem hem blong tekem aksen blong save sevem mani.
“Elektrisiti long Australia hemi VT30 long wan KW/Hr. Mbe long plesia wan KW/Hr hemi VT70 kasem VT80, we i sas tumas,” Mr McGuire i talem.
Wota saplae tu long hom blong Mr McGuire i kam long ren wota nomo.
“Ol spaot long roof blong haus i ko insaed long wan filta tank we toti i stap long hem.
“Klin wota i ovaflo long filta tank, mo i ko insaed long tu wota tank, we i konek long wan elektrik pam blong 240 volts.
Hem i se gud mo klin meintenens long wota system blong evri 2-6 manis, i mekem saplae i efektif, presa i strong gud mo wota i taste gud.
Mr McGuire i no investem sola long haus nomo mbe long trak blong hem tu.
Naoia hemi sevem long wan manis VT20,000 long fuel mo hemi no pem hae rod tax from.
“Mi usum sola nomo blong jajem batri blong trak tru long wan jaja.
“Mo taem mi ko daon long wan hil, mi no yusum ekselereta, mbe mi yusum brek we i stap jajem batri bakeken,” Mr McGuire i talem.
By Tiffany Baldwin.
