Ol skul long Torba, Penama, Malampa mo Tafea i mas open long Monday.

Minista blong Education mo Training, Samson Samsen i mekem anaonsmen ia long National TV tete.

Minista Samsen i askem blong ol skul i open wetem ol strik COVID rul anda long alert level 1.

“Wetem hemia mi stap askem ol Principal Education Ofisa blong wok kolosap wetem ol principal mo Tija blong stat openem ap ol doa blong skul,” Minista Samsen i talem.

“Ol rul blong hand wash mo social distens i mas kat. Ol papa mo mama i mas wok tugeta blong sendem ol pikinini i kobak long skul.”

Minista Samsen i askem ol skul blong mas kat ol plan blong COVID.

“Deitline blong sabmitim ol plan ia hemi long April 29,” Minista Samsen i talem.

“Ol skul long Shefa mo Sanma i saspen yet. Mo ol home skul pakej i mas ko hed.  Ol tija i mas wok folem ol difren mode o platfrom olsem long online learning. ”

Torba Principal Education Ofisa, Philemon Ling,  i talem se shotej blong fuel long Sola bae i afektem operasen blong ol secondary skul from ol studen i mas travel long bot.

Be hemi talem se ol Primary skul bae i on folem ol social distens mo hand wash station.

Mr Ling i talem se ol primary skul i sud opereit long Tuesday.

“Fuel shotej i bin stap blong ova tu wik nao folem COVID outbreak long Port Vila long eli March,” Mr Ling i talem.

Renjo Sameul, Malampa Principal Education Ofisa i talem se ol skul i nid blong putum aot ol plan.

Wan Tija we i tij long wan rimot West Vanualava we i no wantem talemaot nem blong hem i talem se hom skul pakej i had long wan ples we i nokat COVID kes.

Hemi bin askem long ministry blong lukluk long hem.

VBTC Nius i traem blong kasem ol otoriti long Tafea mo Penama be i no posibol.