Apil Kot i talem seh sistem weh Tijing Seves Komisen hemi stap ususm blong save leftemap salari blong ol tija hemi veri pua mo mas jenis.
Toktok ia hemi pat blong wan kot jajmen blong kes blong wan tija hemi lusum akensem Tijing Seves Komisen.
Sem toktok ia wan Suprim kot jaj hemi bin talem finis long jajmen blong klem blong tija ia long 2018.
Naoia weh i gat bigfala dispiut i stap bitwin TSC mo Vanuatu Tijas Union, Apil Kot bakegen hemi kivim jajmen long sem kes ia mo talem sem toktok ia.
Tija ia hemi tiji ova 30 yia mo hemi putum TSC long Kot from oli no apruvum salari incrimen blong hem stat long 2006 kasem 2017.
Kes ia Suprim Kot i bin dismisim mo nomata weh hemi apilim, apil kot tu hemi dismisim long las manis.
Folem Teaching Service Act (Section 38) ol principols blong ol skul oli mas mekem apraisal blong ol tija evri yia.
TSC olsem boss blong ol tija nao bae hemi lukluk ol apraisal ripot ia mo save leftemap salari blong ol tija.
Beh kot hemi faenem aot seh ol principol blong tufala skul weh tija ia hemi bin tij blong hem blong 11 yia oli no mekem apraisal ripot blong hem.
From risen ia kot i harem seh TSC hemi no save mekem incrimens blong tija ia.
Nomata weh tija ia hemi lusum kes blong hem, kot jajmen ia hemi poentemaot seh ol evidens blong kes ia oli soemaot seh i gat wan veri pua sistem blong monitarem mo supavaisem ol ripot weh TSC hemi nidim blong mekem salari increments.
Kot i talem tu seh olsem wan gudfala responsible employer, TSC bae i mas mekem reviu long sistem ia olsem wan prioriti blong makem sua seh oli save dil gud wetem salari incrimens long fiuja.
