Sino-Van fisheries kampani hemi stap wet long Kavman blong contributem mane blong hemi save statem sale blong projek tin tuna we hemi araon VT240 milien.

No mata long lokol demand we hemi low, revenue we Sino-Van hemi stap mekem locally hemi moa hae bitim olgeta we oli expotem.

General Manager blong Sino-Van, Tom Zhang hemi talem se 1 tonne blong expot hemi VT22,500 mo blong lokol demand, 1 tonne hemi save kasem VT1 milien.

Hemi talem se i kat plan i stap blong statem wan market blong raw tuna mo distributem iko long ol nara aela, mo i kat plan blong statem wan Tuna Factory long Vanuatu, be oli stap wet long Kavman blong putum contribution blem olsem pat long agrimen.

“Cannery product we have put a lot of effort to start this project, now we just waiting for the Vanuatu Government to start its contribution to start this project,” hemi talem.

Cost blong expotem raw tuna hemi hae mo kampani blong Sino-Van hemi stap wok blong sevesem lokol demand mo mekem value added prodak.

Sino-Van fisheries projek hemi kam wan joint bisnis tru long wan saening agrimen bitwin Vanuatu Kavman mo China National Fisheries Corporation (CBFC) long Oktoba namba 25, 2005.

Bifo long taem ia, Foma Praem Minista, Hon. Maxime Carlot Korman hemi mekem saening blong wan Joint Venture Agrimen (JVA) wetem CBFC wetem vision blong revivem fis indastri long Vanuatu mo blong usum fis blong sapotem ekonomi blong kauntri.

General Manager Zhang hemi talem se oli kat 6 bot blong fishing naoia hemi stap givim araon 180 Tonnes blong Tuna every 2 manis.

Semtaem hemi se olgeta istap expot nomata long hae cost blong export, from lokol deman hemi low mo igat plante left ova fis everitaem.

Olgeta left ova fis ia oli stap expotem iko long China.

“Because in the local market we can sell only 50 tonnes of tuna every month and the others left, we export them to other countries.”

Mr Zhang hemi se wetem bigfala namba blong tuna we oli kasem long Vanuatu water, lokol demand hemi no naf yet mo oli redi blong statem wan Tuna Factory long kauntri.

“This Project will cost around 2 million USD. As soon as this contribution arrives, we will start the project, it will contribute a lot to the economy.”

Sino-Van hemi stap kasem araon 1000 tonne blong tuna evri yia mo sapos hemi mitim lokol demand bai hemi save winim araon VT1 billion long wan yia.