Owna blong ship Tauraken i aksem Kavman blong bildim wan slipway kwiktaem blong sapotem shipping industri.

Peter Pata i talem se Vanuatu i kasem 40 yia blong hem long yia mbe i nokat ol gudfala fasiliti blong helpem ol ship owna long kaontri.

Hemi talem se kavman i mas lukluk blong i mas kat wan ples blong slipway long Vanuatu blong ol ship i save ko stap pas long hem blong repair.

“ Mifala i stap spendem VT 10 million long olketa ship blong ova sea mo kasem repair,”Mr Pata i talem.

“ Ol ship blong mifala oli stap ron blong tu kasem tri yia olsem long kaontri mo mifala i sek nomo se Ofis blong Maritime Regulator i askem mifala blong ol ship i mas ko pas long slip wei.

“Mi askem kavman blong luksave arem nogud blong mifala mo bildim wan slipway blong help daonem kost blong fixim ol ship ova sea from i sas tumas.”

Mr Pata i talem se fulap taem oli stap karem ol critisisim we i nogud long public konsenem ol operetion blong ol ship blong olgeta mbe kavman i no kam fowod blong kivim eni advaes.

“ Yumi mas save se 90 percen blong World Trade hemi long shipping nomo,” hemi talem.

“Sapos yumi kat wan slipway long kaontri bae i helpem gud mifala.”

Ofis blong Maritime Regulator i talem se oli stap lukaotem vinis wan spes blong kavman i pem blong oli save bilidim wan slipway long hem.

Vanuatu i bin kat wan praevat slipway long aelan blong Santo mbe hemi stil sas blong ol ship i yusum mo naoia i nomo operate.

Shipping Industry long kaontri i gro bigwan long las 20 yia.