Memba blong Malakula Constituensi Hon. Gracia Shadrack i suspend blong Palemen stat tedei.

Gavman oli bin muvum mosen blong remuvum Hon. Shadrack olsem fes deputy spika mo suspendem hem long Palemen blong fo odineri sittings.

Palemen I sidaon tede long moning long namba 5 ekstrodineri sesen. Plante Memba blong Oposisen i wokaot long Palemen bifo oli tebelem mosen ia. Oposisen i gat six Memba blong hem nomo we i bin stap long jamba afta we ol narawan i wokaot.

Mosen blong suspendem Hon. Shadrack i mekem alegesen se Hon. Shadrack i bin toktok i no stret insaed long Palemen. Mosen i talem se long sitting long Palemen long namba 16 August, Hon. Shadrack i singaot se “Bae mi bonem haos ia”.

Mosen ia i talem se toktok blong Hon. Shadrack hemi ko olsem wan tret long ol Memba blong Palemen mo Republik.

Mosen blong suspendem hem i bin gat 28 MPs we i sapot, 2 we i agensem, mo 4 we i abstain.

Hon. Shadrack hemi sakemaot olgeta alegesen ia.

“Olgeta alegesen we i oli mekem agensem mi, mi stap refutem olgeta alegesen ia se toktok we oli talem se mi se bambae mi bonem daon palemen haos, toktok ia i no tru,” Hon. Shadrack i talem.

Hon. Shadrack i talem se bambae i mekem sua se bae i komplitim wokbaot blong toktok ia iko long kot blong faenem aot se i tru se hemi bin talem toktok ia or nokat.

“Blong yu kamaot long palemen blo yu talemaot wan samting we i no tru blong yu spoilem reputesen blong wan colleague blong yu or wan colleague lida jes blong yu gainem sapot, me ting se hemi no stret.”

Hemi talem se bambae oli komplitim tingting ia long kot blong allowem jastis istap oltaem.