Nambatu COVID-19 repatriation flaet blong ol Vanuatu nasonal mo residen bae i kam in long kaontri long tedei.
Darekta blong Pablik Helt mo Spokspesen blong COVID-19 long kantri, Len Tarivonda i talem se moa long 70 Vanuatu nasonal mo residen bae oli kam long flaet ia we bae i kam long New Zealand
“Bae i posibol se namba ia bae i save inkris smol from namba hem i stap jenis oltaem,” Mr Tarivonda i talem.
“Mifala i bin pasem infomeisen i ko long ol famili blong olgeta long wanem bae oli ekspektem. From we taem we oli araef long eapot long Port Vila, bambae i kat ol strik protokol mo prosija we bae oli folem. Bambae oli no save luk ol famli blong olgeta.
“Be bambae yumi prosesem ol paspot mo luggage blong olgeta mo bae oli ko stret insaed long ol bus we yumi arenjem blong olgeta wetem taet polis sekuriti mo oli ko long ol kavman designated fasiliti o ol hotel long Port Vila we bambae oli sevem 14 dei kwarantin long hem,” Mr Tarivonda i talem.
Daerekta ia i talem se pipol we bambae oli kam ia, bae oli folem strik rul we World Health Organisation i putum, bifo oli bodem plen, taem we oli stap long plen mo afta we oli leko plen.
Hem ia hem i nambatu flaet long fes steij blong repatriation.
Kolosap 300 Vanuatu nasonal mo residen bambae Vanuatu Kavman i repatriatem olgeta long fes steij blong repatriation ia.
Mr Tarivonda i talem se “ol pipol blong yumi we oli stap olbaot long ol kantri long wol oli plante ia.
“So ol fes flaet we yumi stap mekem long Solomon, tumoro long New Zealand mo hopfuli long wik ia or nekis wik long Fiji, New Caledonia mo Australia, kolosap 300 everiwan, long ol faefala kantri ia we bambae oli kam long fes steij blong repatriation,” hem i talem.
Daerekta Tarivonda i talem se “Nasonal Disasta Manejmen Ofis wetem Ministri blong Foren Afea i stap divelopem medium kasem long tem repatriation plan we bambae hem i tekem onboard ol narafala kategri blong ol pipol blong yumi we oli stap ova sea olsem ol seasonal woka long New Zealand mo Australia mo ol student blong yumi.
“Maet bambae repatriation process ia bambae hem i kohed kasem en blong yia sapos Coronavirus ia hemi stil stap wetem yumi,” Mr Tarivonda i talem.
Fes repatriation flaet hem i bin kam in long las wik we hemi kam long Solomon Aelans.
Praem Minista Bob Loughman hem i bin talem se fes steij blong repatriation plan bae hem i vinis long en blong June.
Hem i talem se seken steij blong repatriation bae i stat off long fes wik blong August. Mo hem ia nao bae hem i kavremap ol narafala kategri blong ol pipol blong Vanuatu we oli stap ova sea, ol seasonal woka long New Zealand mo Australia mo ol Vanuatu student.
Daerekta Tarivonda i preisem ol foren misen blong Vanuatu blong tekemap wok ia long ol pipol konsen.
