Saturday, July 13, 2024
24.8 C
Port-Vila
Saturday, July 13, 2024
More

    Seasonal woka isu

    Isu blong drink, kat afea wetem ol difren patna mo ronwe long ol farm, Popula agent we i stap sendem bigfala namba blong ol Ni-Vanuatu wokman i ko long New Zealand mo Australia blong ova 10 yia i tok strong long taem blong wan Pre departure briefing.

    Taem Agent blong ETM Consultancy, Sylvie Kalmet i toktok wetem ova 60 woka long eria blong hem, hemi talemaot se fasin blong winim vatu blong famili mo kat difren afea wetem nara man o woman, alcohol mo kava nao i rul bigwan naoia long New Zealand.

    “Bae mi talem se long 12 -13 yia i pas, yumi no bin kat problem wetem kava mbe naoia i kat sam Indian owna oli setem ap sam bisnis blong olgeta long kava mo mekem olsem ol nakamal,”

    “So olsem long plesia i kat window blong hem. Hemia i atraktem ol woka blong yumi. Mo plante long olgeta oli abusum. Oli tekem kava long ol wok dei mo oli no stap ko long wok

    Ol niu afea long scheme hemi wan bigfala problem.

    “Mifala i faenem se afta long COVID, taem oli mekem ol extensen long saed blong visa blong olgeta, long plesia nao bigfala isu i stap kamaot long hem. Moa taem oli stap ovasi oli ko kat ol niu patna mo disaed blong muv on long laef blong olgeta. Long extend we sam long olgeta i kat bebe blong difren man we i afektem relationship mo mared laef long home.”

    VBTC Nius i kat jans blong toktok wetem wan experience seasonal wokman we i pat long Recognised Seasonal Employer blong 13 yia mo hemi talem se pipol i travel from nid blong famili.

    “Mi travel ia mi helpem ol famili blong mi long skul fi blong ol pikinini, mi pem wan transport, taxi mo wan fishing bot; Mi pem wan graon long Efate mo long Santo. Mo mi kat tu haos long Santo,” Mr Barryto Mera i talem.

    “Plante man oli ko, oli kambak oli se mani i nogat mbe from ol spendem mani bigwan long drink. Nara wan hemi oli kat ol patna long plesia mbe taem oli kasem New Zealand oli ko hang long ol niu wan i mekem se i kat plante broken home.”

    Agent Mrs Kalmet i talem se ol agent oli mas mekem gud wok blong lukaotem gud ol wokman taem oli stap ovasi.

    “Ol kontrak we mifala i stap kasem hemi no ol kam olsem nomo mbe kavman blong Australia i apruvum mo bifo wokman hemi saenem mifala ol agent i explenem gud long hem ol reit blong mani, pei blong hem mo taem hemi stap ovasi, sapos hemi kat eni isu we hemi luk se no fama hemi pem mi stret o hemi rafem mi, hemi no tritim gud mi mo hemi no even keas sapos mifala i silip gud o no. Ol tink ia mifala i talem long woka se talem long Tim lida blong yu ale bae hemi toktok wetem boss, hemia hemi fes step, Mo sapos i nogat enitink i hapen kam tru long mi, emailem mi mo bae mi sendem isu ia i ko boss blong farm. Mifala ol agent pat blong mifala hemia tu, i no se mifala i sendem yufala i ko ale fogetem yu.” Mrs Kalmet i talem.

    Ol wokman ia bae oli ko long tri difren farm kampani long New Zealand. 60 woka bae oli ko long Not mo 32 long Saot aelan blong New Zealand.

     

     

     

     

     

     

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen