Polis Trafik long SANMA hemi ranem wan 3-dei join operesen blong jekem ol propa document blong ol pablik transpot long Luganville, las wik.
Komanda blong Not, George Songi hemi konfem se mane we join operesen ia wetem ol stek holda oli kasem hemi ova long VT11 milien.
Hemi talem se total namba blong ol registered pablik vehicle long SANMA provins hemi ova 1000 be long operesen ia oli jekem 200+ nomo.
“Hemi soem se plante infomesen oli leak aot mo plante oli haed,” hemi talem.
“Mi jes wantem assurem yumi long pablik blong Sanma nomo se nogat wan man hemi above the law.”
Komanda Songi hemi talem se mane ia bae oli brekem daon mo bae ko long evri stek holda ia blong oli save usum blong wanem target oli kat.
“Yumi lo Trafik long Polis, yumi kolektem target blong yumi ol polis nomo,” hemi talem.
“End of the day i kobak long basket blong revenue blong Kavman blong usum blong provaedem seves ia ko long ol pipol blong yumi.”
Long taem blong operesen ia, fulap long ol vehicle owna oli nogat pepa mo hemi fes taem blong pem ol propa document.
Fulap tu oli pem wan fine from oli nogat propa document blong ron long wan pablik rod.
Komanda hemi talem se bae kat discussion we bae Polis hemi kat wetem ol stakeholders ia blong karemaot operesen iko long aelan blong Malo, Aore mo eria blong East mo South Santo.
