Wan wokman we i stap klin mo planem flaoa evri dei long eria long Tagabe kasem rod blong airport i askem pipol blong sakem doti long raet ples.
David Nasse i talem se pipol i mas mature long tinktink blong olgeta.
“Eria ia hemi ples we ol turis mo ol bigman long ol nara kaontri i kam long Vanuatu feswan long hem so hemi eye blong yumi; Yumi mas kipim i klin blong moa pipol i luk mo oli kam moa,” Mr Nasse i talem.
“Yumi ol pipol we yumi kat moa save from yumi skul gud mo holem gud wok, yumi mas kat gudfala tinktink ia blong sakem doti long raet peles tu. Mi planem fulap flaoa raon long ol bigfala tri long agriculture ia be ol man i pulum aot. Plante taem ol man i luk mifala nating long wok ia be mifala i traem best blong ples i klin oltaem.
Mr Nase i talem se hemi statem wok blong hem long eli moning.
“Evri moning mi mas pikimap ol toti blong plastic mo ol empti botel we ol pipol oli stap sakem long grass, be i gat place blong toti e stap long ol round abaut blong yumi we bae yumi sakem toti long hem,” Mr Nase i talem.
Mr Nasse i talem se rispek i stat smol long ol kaen fasin blong lisen mo helpem wok blong nara man.
By trainee journalist, Gracelyn Garae.
