Saeklon Package bae i stat rolaot long Wednesday wik ia.
Acting Manager blong Finance mo Financial Services long Vanuatu National Provident Fund, Richard Edwin i talem se package ia hemi olsem wan loan blong wan amaon we i kasem VT50,000 mo oli wantem se seves ia i ko aot kwiktaem.
“So long tumoro(Wednesday) long 8am hemia long Head ofis blong Vanuatu National Provident Fund long Port Vila bae rolaot blong package ia i stat wetem ol Provincial branch tu bae yumi luk operation ia i stat tu,”Mr Edwin i talem.
Mr Edwin i talem se ol pipol long provins i save ko long VNPF branch o oli save downloadem form online mo emailem aplikesen i ko long VNPF.
“Package ia bae hemi wan smol loan mo amaon i kasem VT50,000 blong wan memba i save kam karem blong helpem hem blong hemi save bidlim bak haos o pem kakae sapos famili blong hem i nidim long hard taem ia naoia,” Mr Edwin i talem.
“VT50,000 bae i kamaot long investmen akaon blong ol memba mo sapos wan memba i kat smol amaon nomo long akaon ia from se hemi jes stat wok, hemi bin withdro long age 47 o hemi bin tekem wan loan afta i kat smol balance nomo i stap bae mifala i save lukluk long Medisave akaon blong save transferem balance we hemi nidim blong hemi save kasem VT50,000. Yumi givim aot cheque nomo long Port Vila.
“Long experience long taem blong COVID, sam memba i talem se eh form blong mifala i kam stap long plesia blong kolosap tri wik, mbe taem naoia mi wantem talem long olgeta memba se bae oli lukluk blong ol memba i tekem mani blong olgeta long nekis dei. So hemia i minim se taem yumi stat tumoro bae i kat sam memba oli kasem peimen blong olgeta tumoro nomo.
“Lowest amaon blong givimaot long memba hemi VT5,000. Interest reit hemi 6% long wan yia, term blong hem, hemi 12 manis; Fes tri manis, interest hemi 3% i minim se i nogat interest i jaj long tri fes manis ia.Package we yumi givim aot long COVID i semak long hemia we bae yumi rolemaot long wik ia.”
Mr Edwin i talem se repaymen i kat tu opsen nomo.
Hemi talem se fes wan hemi blong saenem wan oda long wij bank wan man i bank long hem blong automatic deduction i ko long VNPF o pipol i save ofseitem blong talem se oli nomo pem bak.
“Reit we ol memba i tekem i difren so hemi hard blong talem wij amaon nao i stret blong givim,so yumi bin lukluk long pas experience blong COVID mo faenem se hemia hemi wan smol asistens we yumi save givimaot.
Mr Edwin i talem se seves blong direct loan i opereit i stap sapos pipol i wantem tekem mani ova long VT50,000.
Operation bae i klos long 6’klok long aftanun.
Vanuatu National Provident Fund i advaes blong ol memba we oli kat akses long akaon blong olgeta blong jekem balance mo aplae wetem wan detail bank akaon mo ID foto.
