Potential blong Tropikol Saeklon Gabrielle i kasem eria blong Vanuatu hemi low mbe woning blong hevi ren mo wind long Shefa mo Tafea long tete(Friday) mo wiken.
Duty Weta Forecaster long Weta Ofis, Nelson Ian i konfemem naoia long VBTC Nius.
“Saeklon Gabrielle hemi stap naoia long Coral Sea; Hemi stap pas saot east. Saeklon hemi pas aotsaed so hemi long West Saot West blong New Caledonia, Potential blong system i pas insaed long eria blong yumi i low,” Mr Ian i talem.
“Naoia yumi kat woning nomo long weta long saed blong ren we i save afektem yumi long Shefa i ko long Saot. So i save kat landslide mo flood. Bae yumi expektem ol wind blong 25-30 knots we i save kasem yumi long Shefa mo Tafea long Satete; Hemia bae i save kosem sam damej long ol banana, sam fruit tri mo ol dry branch so hemia bae oli save putum aot woning blong Inland wind.
“Strong solwota woning long Malampa, Shefa mo Tafea.” Mo later on bae hemi save extend i ko long Sanma, Penama mo Torba.
Saeklon Gabrielle i stap long Category 3.
