Nebul Health Senta long Not Ambrym i nidim moa health staff blong sevesem ova 3000 pipol.
Eria Administrata blong Not Ambrym i talem long VBTC Nius se blong risosem health bae i helpem bigwan ol sikman blong nomo 2-3 haoa long bot i ko kasem West blong Ambrym long taem blong wan emergency.
“Naoia i kat tu staff nomo we tufala i stap sevem wan population blong ova 3000 pipol we mifala i liv long Not Ambrym; Mo hemia i wan long olgeta jalenj, sapos we wan nurse in jaj hemi stap karem sikman i ko long Vila, ten hu bae hemi stap? Wan we hemi stap hemi no kwalifae from hemi wan nurse aid we wok blong hem i blong putum blasta, ” Mr Willie i talem.
“Long saed blong seves we hemi provaedem, hemi wok long outpatient; hemi givim panadol, hemi admitim samfala sik. Hemi provaedem seves long saed blong Maternity tu long saed blong ol mama we oli kam blong bonem bebe mbe sapos wan mama hemi kam blong bonem bebe mo hemi fesem had taem, yumi stap referem hem i ko long Port Vila bakegen mo yu tinkbaot jalenj blong ol mama we oli stap long bot blong ova long 2 haoa i ko long airport long Craig Cove afta ko long plen mo ko long Vila.
“Long wan health senta, i mas kat fo-faev staff oli wok long hem.”
Mr Willie i askem blong risosem gud health senta long Not Ambrym o vinisim gud airport long Olal blong helpem pipol i tekem kwik seves blong health.
“Hemi nid blong kavman i mas lukluk moa long mifala we i stap liv long ol rimot eria blong ol health senta i save kam ol Mini hospital. Hemi stap kostem kavman blong hemi pem plane mbe seves i stap long doa step blong pipol nomo. Mo sapos yumi lukluk gud, kosting blong wan jata flaet i kam long Ambrym, yumi traem blong imaginem, las yia 2022 yumi kat ol jata flaet mo yia ia 2023 yumi statem ol jata flaet blong tekem ol sik man i kam long Port Vila, sapos kavman hemi tinktink gud hemi se yumi apgredem Nebul Health senta i kam olsem wan hospital bae yumi luk ol cost ia bae i ko daon from yumi kat ol kwalifae pipol long graon.
“Sapos upgrade hemi wan longtaem samting, hemi mas mekem gud Olal airport; from hemi wan longtaem krae blong pipol sins 1980. Yumi traem blong vinisim wok blong airport ia. Mifala i stap travel 2-3 haoa i ko long Craig Cove airport long West. Mo laki se bae hemi gudfala sapos ren i ren mo solwota i raf bae i olsem wanm? Yu tra imaginem sapos wan sikman leg i brok o ol wan mama we i fesem had taem blong bonem bebe.”
Minista blong Finance mo Economic Management i bin talem se Tender proses blong Nebul mo Olal klinic bae i ko hed i no longtaem.
Tufala klinic ia i bin damej long Saeklon Harold long 2020.
Kavman blong New Zealand i givim bigfala mani blong VT80 million blong mekem gud tufala klinic ia.
Hemi talem se Olal airport wok i save ko hed budget i pas long March.
Memba blong Palemen blong Ambrym, Bruno Leingkone i talem se ol wok ia i mas ko hed kwiktaem.
