Norsup mo Unmet Polling Station long Malekula i rikwestem moa envelop blong vot.

VBTC ripota long Malekula, Timothy Makekon i talemaot tete.

“I kat tu polling station we rikwestem extra envelope folem shotej; Wan hemi long Norsup Polling station we i luk Presiding Ofisa i rikwestem nara 200 envelope from plante pipol oli ko vot tete,” Mr Makekon i talemaot.

“Total rijista vota long Norsup hemi 1679. Nara rikwes i kam long Unmet Polling Station long Not West Malekula; Rijista vota hemi araon 1888. So oli wantem moa envelop blong pipol i vot.”

Mr Makekon i talem se Lakatoro Polling station i luk plante yangfala, ol pipol wetem disability oli bin ko blong vot tete moning.

Long semak storian, Ol ballot box blong Vinmavis Polling station i dilei from i wetwet.

“Hemi bin stap insaed long operesen senta long plesia long Lakatoro mo folem ren blong las naet i mekem se ol dokumen insaed long ballot box i bin wetwet mo i mas riples,” Mr Makekon i talem.

“So hemi travel wan haf haoa bifo ol vota i save ko vot tete.

“Nara isu hemi dilei blong ballot box long Kamai hemi wan rimot polling station  hemi stap long wan vilij oli kolem Melken.

“Akses blong rod blong kasem plesia folem weta long Malekula from Pankumu riva; riva ia pipol i mas krosem blong araon 11 taem bifo oli kasem vilij ia. Trak i nosave ko i mekem se helicopta i mas kam daon blong pikim ap long Norsup airport wetem ol ofisa we bae oli ko observe long vot.”

Hemi talem se helicopta hemi bin dilei blong pikim ap olgeta mo oli jes aot long 10:30am wetem ol ofisiol.

Polling station blong Kamai  i kat 155 vota.