Sam Recognised Seasonal Employer (RSE) wokman i talem se ol authoriti i bin handelem gud ol luggage blong olketa nomata fulap toktok long social media.
Olgeta repatriate seasonal wokman ia we oli kam long Vanuatu long Sandei vinis mo stap long kwarentin i talem se “Mifala i no kasem ol luggage blong mifala taem mifala i kam long kwarentin, be tete mifala i smile taem mifala i kasem ol luggage ia, mo lukim insaed everi belonging blong mifala i sef, afta we mifala i wari bigwan.”
Spokespesen blong ol RSE wokman ia i talem se “Mifala i andastanem se New Zealand i kat coronavirus long hem mo Vanuatu i stap long wan serious situasen blong COVID-19 mo hemia nao ol authoriti i mas strict,” hemi talem.
“Hemi taem yumi stop blong toktok tumas long social media be kontaktem ol authoriti responsibol sapos yumi no glad,” hemi talem.
“Mifala i lanem lessen mo mifala i save se ol authoriti i bin mekem stret wok.”
Sos long Lokol authority i respon mo talem se “Plante luggage blong ol wokman ia i stap nomo long eapot mo oli faenem i had blong rilisim from plante oli nokat ol nem tag long hem.”
“Customs long eapot i stap wok nawia blong sotem aot mo bae ol bus i sud stap transpotem i ko long wan wan kwarentin ples we olgeta RSE wokman ia i stap long hem,” hemi talem.
“Sam oli kat ol nem tag mo hemia i helpem mifala plante.
“Ol nara wan i gud blong mas putum nem.”
Sos long Lokol Authority i talem se ol nara item bae ol seasonal wokman ia i karem bak afta long 14 dei kwarentin blong olketa.
RSE Spokespersen ia i talem se “Nomata long ol jalens blong luggage blong mifala, mifala i wantem talem bigfala tankiu long Kavman blong New Zealand mo Vanuatu blong mekem i posibol blong mifala i save kambak long Vanuatu.”
“Bae mifala i patient nomo kasem 14 dei i vinis mo bae mifala i luk fowod blong ko luk ol family blong mifala,” hemi talem.
Wan RSE wokman we basket blong hem i bin broke, no mata se hemi bin hangem lok long hem, i talem long VBTC se “Mi no glad taem mi luk ol clos blong mi i no stap insaed long basket taem oli dropem off long kwarentin ples we mi stap long hem.”
“Mi no save se wanem i happen long hem,” hemi talem.
“Mi save nomo se Customs i alao nomo blong tekem aot ol item olsem speaker o perfume.
“Be no mata long hem ia, mi glad nomo se mi kambak long Vanuatu.
