Ova 100 pasenja long Auckland, New Zealand bae oli kambak long Vanuatu long Satete.
Acting Direkta blong Public Health, Dr Jenny Stevens i konfemem ol repatriation flaet ia.
Greg Wilson, Jif Commercial Ofisa blong Air Vanuatu i talem se folem aprovul blong health advisory committee bai oli stat blong repatriatem bak ol repatriates long tumoro.
VBTC Nius i kasem toksave se I gat fulap Ni-Vanuatu we oli pat long Recognised Seasonal Employer Scheme we oli wantem kambak mbe oli mas ko tru long health screen blong save kam.
Mr Wilson i talem se nomata se ol repatriation flaet i stat, Air Vanuatu i wok kolosap wetem ol health otoriti blong meintenem strong ol COVID-19 sefti protocol blong evri wan i mas sef long virus ia.
Long nara nius, ol domestic flaet blong Air Vanuatu i stat bakegen long tete wetem wan flaet blong Santo mo Norsup long Malekula.
Ol flaet ia i stat bakegen afta we i bin saspendem folem rabis weta blong Tropikol Saeklon Dovi we i mekem plante hevi ren mo strong inland win.
Air Vanuatu i konfemem se ol nomol flaet blong Lonoroe, Longana mo Tanna bai i stat long tumoro Satete mo ol nara aelan long Tuesday nekis wik.
