Thursday, June 13, 2024
25.8 C
Port-Vila
Thursday, June 13, 2024
More

    Repair wok-Tafea College

    Tafea College long West Tanauta i kat bigfala repair wok blong mekem afta long Saeklon.

    Principal Iaka Maimai i talemaot long VBTC Nius se wind blong tufala Saeklon i kasem gud Bilingual skul ia we i tekem in English mo French studen stat long yia 7-13.

    “Skul hemi stap long wan hill so mifala i fesem strong wind blong tufala saeklon ia.Sam long ol damej hemi ol VIP toilet blong ol pikinini i blown aot evriwan, ol bush kitchen blong ol staff hemi aot tu, sam iron sheet long varandah blong ol klasrum, ol iron blong hem i blown aot; Skul ia i bild long 1992 vinis mbe i no bin kat sam repair wok afta mbe long Saeklon Pam,” Mr Maimai i talem.

    “Mein pawa we i kam long mein station i stap daon so i nogat akses long pawa saplae. Mifala wet olgeta long Energy long Vila nao blong kam fixim.

    “Plante long ol wota i kontaminate i stap, mifala i kat andagraon wota sos we hemi stap pump. Mifala i manage blong klinim ol fo water tank ia. So wok blong repair i bigwan i stap; Mifala i wantem National Disaster Management Ofis blong givim sam tarpaulin o wan samting blong yusum fastaem from i nogat shed. Mifala i rikwestem wan generator tu mbe i no kam yet so mifala i faenem sam wei blong hirem ol generator blong save lukaotem ol studen.”

    Tafea i kat 540 studen mo klas i bin stat bakegen long Wednesday.

    “Inkris namba blong ol studen i kam long Efate mo Noten aelan blong Vanuatu mbe fulap nao hemi ol studen blong Tafea,” Mr Maimai i talem.

    “Mifala i talem tankiu long olgeta long Public Works we oli save kam wok long wiken blong fixim rod. Water Supply tu  i save lukluk long pump we i damej mo naoia wota i kam antap long skul.

    “I kat pawa nomo long sam eria long administration mbe ol dormitory yumi wok blong givim ol smol laet long ol studen blong yusum.

    Mr Maimai i talem se disasta ia bae ol parents i faenem i had blong pem skul fi.

    “Yumi andastan se ol parents taem oli kam toktok long saed fi, pa ol parents oli depend kavman ia olsem we hemi stap mekem long COVID mo ashfall mbe i gud blong kavman i klia long position blong hem blong helpem ol skul,” Mr Maimai i talem.

    “Ova 400 studen oli slip insaed long skul mo blong fidim namba ia yumi nidim fi from parents, mo las yia grant i bin dilei kasem en blong yia.Major jalenj naoia, mifala i depend long rice, tin tuna, tin fish mo eni mit locally. Tete wan man buluk i ded hemi talem long mifala, mifala i ko tekem haf leg blong hem, yumi save se saplae blong mit Tanna wan jalenj vinis mbe again praes, las oda blong ration less than a month hemi stap araon hemi VT1 million vinis, mo sapos ol parents no pem fi hemi gud kavman step in blong help.”

    Lamkail komuniti i stap help blong bildim wan shelta blong karem ol dei studen.

     

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen