Minista responsible long Referendum, Hon. Johnny Koanapo hemi saenem Referendum polling stesen Oda yestedei blong putum 6 niu polling stesen long Vanuatu.
Taem Oda ia hemi gazette bae hemi putum 21 niu polling stesen tu ovaseas, mo hemi givim wan total blong 379 polling stesen insaed long kauntri mo ovaseas.
Las wik long Fes Odineri sesen blong Palamen, Hon. Koanapo hemi anaonsem se long Australia i kat 13 polling stesen, long New Zealand i kat 6 polling stesen, long Fiji i kat 3 polling stesen mo long New Caledonia i kat 1 polling stesen.
Hon. Koanapo i talem long wan press konfrens long Mei 21st, se Gavman i stap wok blong mekem sua se fulap long ol pipol oli save patisipet long Nasonal Referendum ia we bae i tekem ples nekis wik long Mei 29th.
“Yumi kat 6 niu polling stesen we oda hemi kaveremap olsem ol niufala polling stesen we bae ol pipol oli ko blong oli kondactem ol vot blong olgeta long hem,” hemi talem.
“Yumi increasem tu long ol pipol long ol aelans blong yumi particularly long Santo wetem Malekula.”
Minista Koanapo hemi talem tu se hemi bilif se Gavman hemi kaveremap most long ol area finis long kauntri mo risen why Palamen i klos early hemi blong oli continue karemaot ol awenes blong Referendum.
“Hemi blong alaowem ol pipol especially ol MPs blong oli save ko aot blong mekem ol wok we hemi required blong help blong oli save explenem Article 17A and Article 17B.”
Minista hemi talem se preperesen blong Referendum hemi gohed mo hemi “includem preperesen we Principol Elektrol Ofisa (PEO) hemi stap embark long hem wetem Komisen, lidasip blong hem wetem Jeaman blong Komisen so evri wok istap ko.”
Hemi endem toktok blong hem wetem wan apil iko long pablik blong kam vot nekis wik.
“Mi wantem continue blong urgem evriwan se yes yu appear long polling stesen blong yu long namba 29 blong vot.”
