Fos laba i stil wan isu we ol Pacific seasonal woka i stap fesem long Recognised Seasonal Employer scheme long New Zealand.

Leina Isno wan strong advocator blong ol Pacific Island Worker i reisem konsen blong hem long tritmen we ol employa(boss) oli mekem long ol woka olsem fosem ol woka blong wok taem oli sik.

Ms Isno i talem se ol tritmen we woka oli fesem hemi no stret blong wan man i liv lo kaen eria olsem.

“I saveh kat araon 15 pipol oli insaet long wan haos, wan washing machine ,one stove blong evri man i yusum mbe stil evri wan i pem semak rent i kolo ol boss,” Ms Isno i talemaot.

Hemi talem se ol woka ia oli nosave toktok aot taem oli sta fesem ol fasin olsem from oli fraet blong putum olgeta long spotlaet blong oli nomo wok.

Ms Isno i talem se fos laba hemi taem wan woka hemi sik big wan mbe employa(boss) bae nosaveh kim sik lif long woka mo bae oli mas kontinu blong wok nomata long sik.

”Wan inciden we I jes hapen i luk wan woka emi kof blad mo i ko askem long boss blong i kolo hospital mbe employa i talem se bae nosave ko mo bae i mas kontinu blong wok sos no bae nokat pei,” Ms Isno i talem.

“Ol kaen trabol olsem ia naoia oli sta ko bak long wanem oli talem se modern slavery from ol boss oli sta breachim(brokem)ol raet we wan wan woka i kat.”

New Zealand Prime Minista, Jacinta Ardern hemi tok strong long ol boss we oli no treatm gud ol seasonal woka blong Recognised Employer scheme.

“Sos ol employa we oli sta treatim ol woka blong olgeta nokut olsem, olgeta oli nokat privilij olsem blong kat ol gudfala woka olsem mo New Zealand kavman hemi luk save nid blo ol pacific woka mo bae mifala i mekem wan aksen,” Mrs Ardern i talem.

Ms Isno i talem se i sad blong no luk eni aksen long Vanuatu kavman.