Niu health aid post projek blong Ranon long Not Ambrym i open tete.
Eria Administrata blong Not Ambrym Eria Kaonsel, Jackson Willie Bulemaru, i talem se komuniti mo Not Ambrym Eria Kaonsel nomo i fandem projek ia blong ova VT500,000.
Salome Kenneth, Malampa Public Health Maneja, i talem se aid post ia bae i provaedem health seves long ova 4000 pipol.
Mrs Kenneth we i stap long Not Ambrym i talem se hemi wan ajivmen blong pipol.
“Aid post ia i open bageken afta long wan fala aid post long faea maontein long eria blong Ranon i bin klos daon taem we yumi bin lusum wan vilij health woka we i bin wok long hem,”Mrs Kenneth i talem.
“Hemi ova long faev o six yia bifo yumi save kambak blong openem wan niufala aid post tru long komitmen blong ol pipol long Not Ambrym long ol hadwok blong olgeta.
“Mi talem tankiu long long eria administrata blong Not Ambrym, Jackson Willie blong save putum tinktink ia mo wok long ol projek olsem blong givhan long pipol.”
Mr Bulemaru i talem se Not Ambrym Eria Kaonsel i kat ol inkam generating projek we i stap in ples blong mekem mani blong i save fandem ol own projek blong hem bageken.
I kat wan bilding we wan bisnisman i stap rentem, ol maket haos fi we oli kolek evri manis, wan guest haos blong eria kounsel we i operate 24 haoa we plante man i stap yusum, wan eria blong kaonsel we National Bank blong Vanuatu i stap rent long hem evri manis blong VT40,000 naoia we seves blong hem i ko online mo sea bot transpot we ol pipol i save pem. I kat ol reit blong sea transpot, sapos bot i travel long Nebul kasem Craigcove bae hemi VT13,000 o long Olal kasem Craigcove hemi VT15,000.
“Mesej blong eni nara divelopmen long futja i hapen, yumi mas unite blong mekem drim i kam tru,”Mr Bulemaru i talem.
“Mbe mi glad tumas long wanem yumi ajivim tete.”
Mr Bulemaru i talem se long taem naoia we Wol i stap long COVID pandemic, ol inkam projek ia i sapotem olgeta bigwan from oli no dipen.
Eria kounsel blong Not ambrym i kat 43 komuniti.
