Folem weta fokas long Meteo Ofis blong wik ia bae yumi lukim rabis weta i save gohed blong sam moa dei be i nogat eni tret blong saeklon.

Rabis weta ya i kavremap Port Vila mo sam nara aelan we ino allaowem pipol blong gohed gud wetem ol nomol aktiviti.

Tom Natick long Meteo Ofis, i wonem pablik se weta ya bai i save stap blong sam moa dei mo pablik i advaes blong stap pripea oltaim.

“Sins yumi stil kat draot emi still stap ova long yumi lo Vanuatu, tudei, tumoro igo bai yumi still expectem ren mo tanda stom,” hemi talem.

Hevi ren nomo i bin kam strong tumas long noten taon long tiusdei aftanun, we i kosem pawa kat mo i fosem sam man blong mas finem sef ples blong haed.

Sam ples long Tanna tu i gat konsen folem sefti, from nomo se oli stap lukim sam hevi ren.

Mr. Natick i tokbaot from wanem woning i bin stap nomo long noten pat blong kaontri, wetem infomesen we model blong weta fokas hemi soem.

Hemi talem se lo ples blong olgeta i kat ol klaod mo oli muv igo long is blong Santo aelan.

“Klaod ia nao hemi stap ova lo yumi, we i kostem yumi sam hevi renfol, that’s why yumi produsum severe weta woning,” hemi talem.

Hemi talem se ol klaod we I stap ova long Tanna mo ol narafala aelan long saot, hemi “isolated’. I minim se ino tumas hevi klaod olsem hemi long Santo.

Woning blong rabis weta ia i fokas naoia long Torba provins.

Mr Natick i talem se strong woning i save kasem saot long ol dei we i stap kam.

“Ating lo Fraede igo ya ba yumi expectem sam klaod lo saot,” hemi talem.

“Hemi posibol blo yumi save putum sam severe weta woning lo Fraedei igo.”

Hemi 10 dei finis afta long niu yia, mo plante ples i lukim finis hevi renfol, laetning mo bigfala tanda.