National Disaster Management Office i putumaot red alert blong Torba provinis from Tropikol Saeklon Lola tete moning.

Hemi minim se oli stap expectem kale fors winds long nekis 24 hours mo ol pipol blong Torba mas stap insaed mo wan sef ples mo mas offem ol pawa mo gas.

VBTC repota long Torba provins Mika Albie hemi beis long Motalava, mo hemi se tedei moning igat smolsmol wind mo rain.

“At the moment mi stap toktok ples hemi cloudy i stap mo rain hemi still stap foldaon mo wind hemi stat blong blow strong,” hemi talem.

“Mo tu yumi stap experiensem tu raf solwota we hemi kohed noaia, everi banana bot oli pulum iko so mo samfala oli ankarem long sef ples blong anka blong kipim bot hemi sef i stap.

“As yumi stap harem oli bin putumaot red alert long ful aelan blong Torba, ol pipol oli stap pripea naoia i stap, oli stap kaveramap haos blong olgeta while oli stap fesem rain we hemi sta foldaon naoia we mi stap toktok, pipol oli stap kip redi blokem ol haos blong olgeta wetem ol lif blong kokonat mo sam long olgeta EOC or emejensi operesen senta oli stap setemap olgeta grup blong olgeta vinis blong traem blong wok tugeta blong kolektem ol infomesen mo pasem ol stret infomesen iko ol komuniti araon blong pipol oli kip alet long muvmen blong Saeklon weh hemi stap kam araon long kauntri.”

Provincial Education Officer long Torba, Philemon Ling, i talem lo VBTC Nius se ol studens araon long Torba bae oli klosem ol klas tedei folem nomo wind we hemi stap insaed long baondri blong Vanuatu espeseli long Torba provins, mekem se everi klas i mas klos tedei mo mesej ia i pass iko tru long ol prinsipol blong olgeta skul long Torba provins.

Vanuatu Meteorology hemi givim aot finis woning namba 2 blong provins blong Torba mo Penama.

TC Lola hemi stap long Square J namba 3 olsem wan kategori 2 saeklon mo hemi muv long sout east direktsen.