Port Vila Municipal Council i talem se niu propos buriol fi blong VT 82,000 bae oli ridusum sapos oli kasem sapot.
Folem plante social media post we i stap ko raon Public Relation Ofisa blong Port Vila Municipal Council, Pauline Timothy, i talem se fi blong buriol long niufala graveyard i no finol yet.
Ms Timothy i talem se proposol ia i folem jalenj blong faenem graon blong bildim niu graveyard.
Port Vila Municipal Council i bin makem wan graon i no longtaem i pas we hemi 14 hekta long eria blong Eratap, Efate mbe ol lokol i bin tok akensem se hemi stap long doa wei blong vilij.
Mekem se wetem help blong komuniti ia nomo oli lukaotem wan niu graon we hemi 20 hekta long Eratap nomo.
“Bae mi talem se VT82,000 hemi propos fi yet mo sapos long futja, Kavman i kam in blong givim sam vatu blong sapotem council ten fi i save ko daon,” Ms Timothy i talem.
Long cemetry long Port Vila, nomol woking dei fi blong berem wan ded man hemi VT34,060 mo wiken fi hemi VT48,960.
Ms Timothy i talem se wan nara resen blong inkrisim fi hemi from kost blong transpotem ded man aot long haos ded long Vila Central Hospital mo ko long Eratap.
Wan lokol residen blong Port Vila, Tenkon William, i talem se pipol i no akri nomo.
“Fi ia i hae tumas from yumi stap long wan pandemic blong sik,” Mr William i talem.
“Yumi tekem se yes hemi wan niu ples blong grave mbe wanem ia yumi pem i add ap kasem VT 82,000? From long olfala cemetry naoia yumi pem ova VT 40,000 nomo long wiken.
“Fi ia yumi pem graon nomo mbe extra ia i kam blong wanem? Bae yumi helpem council blong tekem bak mani blong hem o wanem?
“Long Port Vila blong pem fi ia nomo i hae tumas.”
Ms Timothy i talem se wan nara resen blong inkrisim fi hemi from kost blong transpotem ded man aot long haos ded long Vila Central Hospital mo ko berem long Eratap.
Hemi talem tu se niu cemetry ia nem blong hem bae hemi Port Vila Memorial Gardens.
Ms Timothy i talem se bae i kat wan chapel blong kondaktem ol jej seves blong ol famili we i lus. Mo tu bae i ples blong cremation-eria blong bonem ol ded man sapos ol famili i wantem yusum metod ia.
Port Vila Municipal Council i bin pem VT26 million mo oli stap wok blong mekem konsaltesen wetem ol pipol long Eratap i no longtaem.
Long graveyard long town, oli stap yusum bak ol olfala grave blong longtaem blong berem ded man.
Ms Timothy i mekem wan kol i ko long ol pipol we oli stap yusum social media blong faenem gud infomesen mo post blong no konfusum pipol.
Hemi talem se Ofis blong Port Vila Municipal Council i stap evri taem blong pipol i ko askem infomesen.
