Praes blong VUI limited long Santo bae inkris wetem VT8 per kilowat blong nekis manis afta long wan konsaltesen we Utiliti Regulatori Atoriti (URA) hemi mekem long wik ia.
Konsaltesen hemi go hed yet long wik ia long ol diferen komuniti long Luganville eria mo ol komuniti aotsaed long Luganville mo ol aelan olsem Maewo, Ambae emo Vanua Lava we oli ol men kastoma blong VUI limited.
VBTC Nius i toktok wetem Sinia Regulatori Atori, Edmond Tambisari hemi talem se pepos blong konsaltesen ia hemi blong tokbaot from wanem nao bae kat inkris blong praes blong elektrisiti.
“Normally praes blong VUI hemi stap long VT52.32, VT52.32 per kilowatt hawa praes ia bae hemi shud stop long end blong Januari ia and then niufala price we mifala runem konsaltesen n lem i shud stat long February.
“Afta long konsaltesen ia, wetem evri feedback we mifala risivim bae mifala putum tugeta mo bae mifala luk sapos i nid blong kat eni jenjes o no and then yumi kam ap wetem final praes.
“Taem yumi implementem price ia bae hemi charge long evri VUI kastoma long Luganville mo ol outa aelan.”
Praes blong elektrisiti blong VUI bae inkris long VT8 per kilowatt we minim se aot long VT52.32/KW bae hemi ko antap long VT60.75/KW.
Hemia bambae oli karemaot afta taem konsaltesen ia hemi finis mo bae ofis blong State Law hemi gazettem blong kam legal blong URA hemi save implementem.
Mr Tambisari hemi talem se i kat ol risen from wanem nao ol praes ia bae inkris.
“So VT8/KW inkris hemi mostly to do wetem ol kost blong VUI we yumi luk praes blong fuel i ko antap, praes blong ol material i ko antap and hemi also kat ol rekavari blong ol investmen we VUI I bin mekem and then I kat bigfala investmen nao we oli bin mekem afta long TC Harold.
“Pat blong investmen ia mo ol sapot ko long outa aelans, Kavman I bin providem but then again, stil bigfala kost hemi remain we yumi nid blong rekaverem blong VUI i save continue blong providem elektrisiti seves blong ol kastoma blem.”
Tim blong URA hemi stap naoia long komuniti blong Luganville mo oli enkarejem ol pipol blong stap mo liste taem oli pas long komuniti blong olgeta.
