Ripot blong wan inciden weh i tekem ples las Fridei naet bitwin wan female student mo sam ofisa i stap finis long hand blong polis.
Diana Isaac mo bigfala sista blong hem Dorothy Isaac i confirmem long VBTC Nius seh oli bin go faelem complen blong hem long yesterdei namba 1 Oktoba.
Taem tufala i toktok wetem VBTC Nius tede, Diana mo bigfala sista blong hemi i confirmem seh tufala i faelem complain finis wetem Professional Standard Unit.
Professional Standard Unit hemi wan bodi insaed long Vanuatu Polis Fos weh wok blong hem i blong lukluk long ol complain weh i akensem ol polis ofisa.
Diana weh hemi wan studen blong Tebakor Collage hemi tokbaot wanem weh hemi seh i hapen long hem long nite ia weh hemi risen behind long complen i ko long professional standard unit.
Toktok weh polis i bin talem long wan steitmen i seh from gel ia hemi dronk tumas mo hemi kasem smol hit long maut blong hem beh hemi no intentional.
Bigfala sista blong Diana, Dorothy weh hemi bin mekem original post long fesbuk blong resem konsen from inciden ia i talem seh famli blong tufala oli no glad.
Folem informesen weh i kamaot long polis, Professional Standard Unit hemi stap investigatem ol kleim olsem mo sapos hemi wan criminal complen bae hemi folem nomol proces blong go long prosecution mo kot.
Incident ia hemi resem fulap consen too long contact blong ol ofisa especiali how oli interact wetem ol youth especiali woman mo gel.
Wan steitmen weh i kamaot long Vanuatu National Yut Kaonsel hemi talem seh oli luksave bigfala wok weh Vanuatu Polis Fos hemi stap mekem beh hemi impoten blong ol ofisa i mas eksesaisem caution long duti blong olgeta. Steitmen ia hemi talem seh wael oli no enkarejen yuts mo students blong usum blong alkol, polis i mas ususm risonable fos taem oli dil wetem ol yang pipol.
