Wan plen blong Air Taxi hemi ko daon long solwota saot long Efate Fraede long aftanun.
Faev pipol long aircraft oli sef folem ship blong polis, MV Emma Kate, i bin resku olgeta.
Long statemen long sosel media, Air Taxi i talem se wan aircraft blong hem i bin lusum pawa mo pilot i mas go daon long solwata.
Air Taxi i talem se wan boat we hemi bin klosap long plen i kasem ol pipol blong plen.
Komisina blong Maritime Authoriti, John Less Napuati, i talem long VBTC Nius se taem plen hemi ko daon long solwota oli kasem wan alert ikam long New Caledonia.
Plen blong Unity Airline hemi bin mekem wan sej long eria ia mo faenem faev pipol long wan laef raft.
Pilot blong Unity Airline, Robin Deamer, i talem long VBTC Nius se evriwan i oraet mo olgeta long Unity Airline i dropem sam item olsem plastik blong wota iko long olgeta long laef raft.
Ship Helpr-1 mo ship istap long rod blong hem iko long solwota klosap Erromango.
Mr Napuati i talem se i bin gat resku operesen we hemi wan join operesen we Nasenol Disasta Management Ofis (NDMO) hemi coodinetem.
Long 5.40pm tedei, Mr Napuati i bin konfemem ship blong polis i help tekem ol pipol blong plen mo resku operesen i finis.
Mr Napuati talem tankiu long help blong evriwan.
Praem Minista Hon. Sato Kilman Livtunvanu i bin asurem ol famili blong olgeta pasenja se gavman bae hemi iusim evri risos blong hem blong tekem ol pasenja ia ikam soa.
Pablik Relesen Ofisa blong Gavman, Antoine Malsungai, i talem se Hon. Kilman hemi gohed blong monitorem situesen.
Air Taxi hemi talem tankiu long Komisina blong Polis, Polis Maritime Wing, cru blong MV Emma Kate, Australian Federal Polis, Australian Defence Force, mo Robin Deamer blong Unity Airlines.
