Vanuatu hemi lonsem wan plan blong stopem kansa long nek blong basket blong bebe.

Vanuatu hemi kat wan population blong ova 98,700 woman we oli kat age 15 iko untap we oli stap long risk blong kasem sik blong kansa long nek blong basket blong bebe, or cervikol kansa.

Ministri blong Helt i talem se cervikol cancer hemi rank namba two common cancer blong woman long Vanuatu weh oli kat age 15 iko untap.

Vaksin mo screening blong kansa ya hemi wan important part blong plan blong stopem kansa ia.

Human Papilloma Virus, or HPV, hemi wan vaksin we oli usum blong stopm cervikol kansa.

Vanuatu HPV program unda long Ministri blong Helt mo sapot blong Ministri blong Education, hemi stat blong karem aot ol vaksin program ia long Malampa mo Torba komuniti, mo oli tagetem ol gel long skul mo aot long skul we oli kat age 9 kasem 13 yia.

Program ia i stat long Tafea, Shefa, Sanma mo Penama provins long manis ia mo Novemba.  

Direkta blong Publik Helt, Dr Jenny Stephens, i talem se Ministry blong Helt i gat wan eim we 75% blong ol woman we i gat HPV bae oli resivim tritmen mo bae 90% blong ol gel we oli gat 9 yia kasem 13 yia oli gat vaksin.

Kodinator blong program ya, Simo Samson, hemi talem seh wan long olgeta jalenj blong program ya hemi taem ol parent oli no allowem blong pikinini oli tekem vaccine ya.

“Yumi submitim ol konsent forms, blong ol parents bae oli saenem, and then bae yumi stikim ol pikinini, but it looks like plante long ol konsent forms ya oli no kam in taem, and maybe plante parents oli no gat ol clear ideas yet lo impotens blo vaksinasen blo cevikol kansa prevensen,” Mr Samson i talem.

Long data weh hemi kam aot long HPV repot hemi soem se long evri yia ikat ova 21 woman we oli kasem sik ya mo 19 long olgeta oli ded long cevikol kansa.

Elimination blong cevikol kansa long Western Pacific or ECCWP, hemi plan blong screenim ova long 30,000 women long Vanuatu.

Screening ia hemi stat long end blong Septemba las yia mo oli screenim ova long 3,500 woman finis.

Senya obstetriks mo ginikologi konsultan long Vila Central Hospital, Dr Boniface Damutalau, hemi injaj blong skrinim ol woman mo hemi talem se ikat tu ples blong skrin we hemi stap long Port Vila mo Luganville.

Hemi talem se taem wea ol woman i go long klinik blong skrinim, ol woman mas mekem wan test hem wan. Resal i kam aot semek dei.

“Aim blong skrinim emi blong yumi faenem ol changes we emi konfirm long kansa, because yumi long Vanuatu, semak olsem ol nara kantri, lo and midal-incom kantri yumi nogat tritmen blo ol advans kansa,” Dr Damutalau i talem.

Hemi talem i se taem we ol woman i bin kam lo klinik mo oli lukim ol saens mo simtoms, oli advans finis moo li no save mekem wan tritmen long ples ya.

“So ating for yumi we yumi no karem fulap resos blong tritmen, ating impoten message ya nao blong kam skrin.”

Vanuatu Ministri blong Helt mo World Health Organization hemi plan blong tekm aot cevikol kansa long Vanuatu long yia 2030.

Vanuatu i wok wetem plante international patna mo dona organisasen blong mekem olgeta aksen we plan i talem.