Gavman i gat plan blong putum satelite komunikasen long evri eria kaonsel long 2025.
Minista we i risponsibol long naturol disasta manejmen ofis, Hon. Ralph Regenvanu i talem long Palemen long las wik se komunikasen hemi wan jalens long taem blong wan disasta.
Minista Regenvanu i talem se ol asesmen ripot blong eria we TC Lola i bin damejem, hemi late from ol komunikasen netwok i go doan.
Hemia i affectem rispons blong gavman from hemi nidim asesmen ripot blong mekem wan rispons plan.
Minista Regenvanu I talem se satelite komunikasen bae hemi mekem rispons i go hariap.
“Gavman i gat wan program blo nekis yia bae hemi rollem aot long ol satellite blong evri lokol eria kaonsel, blo mekem se stret afta wan saeklon yu gat satelite komunikasen. Yu no nidim blo wet lo wan towa i fal doan o wanem, yu save komunicate directly,” hemi talem.
“I minim se lo day afta saeklon, yu save sendem wan asesmen ripot i kam finis.”
Long Tuesday, Minista Regenvanu talem se aroan 29 lokal eria kaonsel i gat satelite komunikasen finis mo i gat plan blo pem equipmen blo nara 29 kaonsel long nekis yia.
“Hopefully by 2025 bae yu save gat evri eria kaonsel we save gat satelite komunikasen we bae hemi really improvum ability blo gavman blo respond lo ol disaster from bae i save gat instant komunikasen,” hemi talem.
Long Palemen long las wik, Minista Regenvanu i talem long ol memba blong Palemen se oli mas talem ol lokol eria administrata blong mekem ripot afta wan disasta.
“Taem eria administrata i no wokabout, i wan problem,” hemi talem.
“Eria administrators oli first point blo kontact blo gavman.”
Minista Regenvanu pointemoat tu se komunikasen i dipen bigwan long wan aktiv grup blong ol Community Disasta mo Climate Change Committee (CDCCC).
“Fulap komuniti blo yumi i no gat wan aktiv CDCCC,” hemi talem.
“CDCCC naoia i mekem asesmen i kam kasem gavman. Sapos yu no gat aktiv CDCCC, bambae gavman nao i mas kam doan long komuniti blong yumi blong mekem asesmen mo hemia bae i tekem weeks.
“Sistem we yumi wantem setemap naoia lo Vanuatu, i mas gat Community Disasta mo Climate Change Committee lo evri komunity lo Vanuatu we oli aktiv.
“Wetaem we wan saeklon i kill today, tumoro lo moning, oli go raon, oli save finis hamas haos i damej, hamas famili i nidim kakai, garen. By that same day, oli go lo lokol eria administrata blo olgeta, by that same day ripot tru lo satelite i kasem NDMO, and lo nekis day yumi statem rispons.”
