Ol pipol long Not pat blong Vanuatu i stap rere naoia folem Tropikol Saeklon Judy.
Lokol long Nerenigman vilij long Motalava i talem se ples i klaody nomo tete.
“Naoia weta hemi cloudy, ren i foldaon mo wind i stat blong blow strong; Sam long mifala we i kat akses long fesbuk, mifala i stap help blong pasem info long ol nara pipol blong pipol i redi long ol haos blong olgeta mo stap sef,”Ray Tagai i talemaot.
“Ol skul, mifala i putum gud ol kakae blong ol studen we oli slip long ol boarding skul, sam kapa we mifala i mekem shelta lem, mifala i mas muvum i ko insaed long haos o wan sef ples.
“Ol natangura haos, mifala i fasem ol leaf kokonat blong sakem blokem ol aos ia. Ol smol private karen mifala i stap katem daon sam branch blong hem blong i no damejem kakae.
“Ol evacuation senta we mifala i stap yusum blong hide hemi ol kavamn bilding olsem clinic mo ol skul from oli strong.”
National Disaster Management Ofis i putum yellow alert long Torba, Sanma, Penama mo Malampa.
Willie Buleuru long Vusiroro vilij i talem se oli mas wokbaot i kam antap long hill blong kasem Digicel netwok mo jes faenem aot se i kat wan saeklon.
“So mifala i kobak long vilij mo infomem pipol blong pripea naoia,” Mr Buleuru i talem.
“Radio Vanuatu mifala i kasem mbe i no klia.”
VBTC Provincial Ripota long East Ambae, Gibson Tari i talem se oli kasem intraksen long education blong ol skul i saspen kasem long Thursday.
“Naoia ol pikinini i kobak long ol haos blong olgeta sins long aftanun vinis.”
Duty Weta Forecaster, Anthony Wong i talem se saeklon ia i save kam category 3 taem hemi stap muv i kam daon long ol aelan blong Vanuatu.
Meteo i talem se hevi ren, flood mo wind long solwota bae i stap long ful Vanuatu.
