Pipol long aelan blong Ambae i stap lusum plante long ol aelan kabij blong olgeta.

Hemia folem hae namba blong ol African snail we i kam wan konsen long plante pipol.

Hemi samples 10 kasem 15 yia nao, we African snail i go long Ambae mo i distepem bigwan prodaksen blong ol kakai long karen.

Ol pipol long aelan ya, i talem se i neva gat snail ya bifo be naoia emi kam plante.

VBTC ripota long Ambae, Gibson Tari, i talem se emi kam naoia wan problem blong ol fama long aelan ya.

“Ol fama oli faenem i hard blong growem aelan kabij, from African snail i stap kam blong kaikai aot ol aelan kabij ya.

“Long maket naia, aelan kabij oli stap salem long very smol kwantiti.

“Hemi stap afektem nao, espeseli ol mama from samting ya hemi wan sos of inkam blong olgeta tu,” Mr Tari i talem.

Hemi talem se i gat ol advaes long sam lokol fama we oli givim blong helpem ol nara fama, be situasen i nogud yet.

“I gat wan fama i atalem se bai mifala planem ol han blo kabij we i longfala blong African snail ino save kakai lif blong hem. Be ino wok from hemi stil klaem long stamba blong kabij.

“In few yias taem, bai mifala lusum evri kabij blo mifalam” Mr Tari i talem.

Mr Tari i talem se i wan wari naoia we namba blong kabij i go daon, mo snail ya i stat blong kakai ol nara crop long karen.

“Wanem we mi witnesem, hemi no kakai nomo aelan kabij. Naoia hemi stap muv i go long ol nara plants tu.

“I gat wan lokoli plant we mifala sta kolem long lanwis, oli kolem windi-windi, hemi kam wan feveret kakai blo African snail.

“Lif blo taro tu hemi stat blo sta kakai sloslo,” Mr Tari i talem.

Hemi talem tu se African snail i stat blong go insaed long haus blong ol pipol.

“From hemi sta kam bigwan tumas, African snail i save klaem antap long ol wol blo haus, mo hemi iven save go insaed lo haus,” Mr Tari i talem.

“Mi luk se hemi stap kamoat long ol ol ren taem o ples we i moist (wetwet).”

Mr Tari i talem se snail ya i stat long is-ambae, mo i kasem finis not-is, not-wes mo saot blong aelan ya.

Eria administreta long is-Ambae, Moris Tari, i talem se oli bin raisem konsen ya long eli yia wetem dipatmen konsen.

Be advaes we oli tekem, ino inaf blong stopem namba mo muvmen blong African snail.

“Oli advaesem mifala nomo se mifala jes pikimap, putum lo bag, fasem taet oli tet,” hemi talem.

“I very had blo mifala kontrolem from hemi travel by naet, dei taem bambai hemi haed insaed lo ol tik bushes.

“Emi nid tumas spos we olgeta lo bio-sekuriti oli save tekem atensen blo oli save kam helpem pipol blo oli save daonem lelebet African snail long aelan.”

Hemi talem se i wan wari naoia we african snail i kam wan moa disasta antap long damej blong Manaro volcano, long Ambae.