Hevi ren long Saot West Pentecost long eli wik ia i mekem pipol i wari long hao bae oli krosem riva blong ko vot tumoro.
Ren i mekem ol riva blong overflow.
Jif Vira Kokon long vilij blong Waterfall i talem se ol vilij olsem Ranwadi, Waterfall, Whitewota mo Baravet bae oli fesem had taem blong krosem riva.
“Mifala i wari long hao nao bae mifala i krosem riva blong ko long ol polling station,” Jif Kokon i talemaot.
“Eria blong yumi i stat long Sanmara i ko kasem long Hotwata we Waterfall hemi insaed. Polling station blong yumi hemi long Ranmawat. So yumi traem mekem sam arenjmen blong help pipol faenem wan wei from i kat ol pipol wetem disability mo ol olfala we oli nosave wokbaot longwe.
“Nara jalenj tu hemi ol ples we oli liv long hem i no kolosap long ol solwota. So wan trak bae hemi stap long bush blong pikimap ol man sapos i ren tumoro. Mo bae i kat wan bot i tekem olgeta long Waterfall i ko antap long Ranmawat blong mekem se ol man i vot.
“Long aelan trak mo bot i sas from fuel be hemi wok blong yumi blong mekem sua se evriwan i mas vot.”
Jif Kokon i stap mekem sam wei long hao nao pipol bae i muv i ko long ol polling station sapos weta i stap semak.
Ol trak tu oli nosave krosem ol riva mo sapos pipol i ko long bot bambae hemi sas.
Jif Kokon i talem se oli hop from gud weta nomo long dei blong vot.
