I kat ova 2000 pipol long 13 komuniti blong West Gaua mo 30% nomo oli kat full akses long helt seves blong Womal klinik.

Nes blong Womal klinik, Fancy Rolen hemi talem se olgeta mein jalenj hemi i nogat transport, i nogat rod blong trak, i nogat network mo longfala rod blong sikman i mas travel blong kasem dispenseri.

Hemi talem tu se blong karem ol sikman long bak hemi wan praktis blong long taem from nomo se i nogat transport mo blong karem bot hemi sas tumas.

Infomesen se aot long 13 komuniti ia i kat 3 komunit nomo we oli stap aksesem seves blong helt from ol sikman save wokbaot kolosap nomo blo kasem.

Mrs Rolen hemi stap mekem ol Outreach prokram blong visitim ol sik man long evri 13 komuniti stat long Dorig kasem long Matana long West Gaua.

Plante long ol mama ia taem oli pregnant oli no karem ol tritmen long klinik from i nogat rod blong trak mo Womal dispenseri i nogat bot blong visitim olgeta.

“Fulap long ol mama blong mifala oli bonem bebe aot saed long klinik,” hemi talem.

“Ol piknini anda long 0 – 1 yia mifala nosave kasem namba blong olgeta from tete ol mama oli pregnant nomo long vilej mo oli bonem bebe long vilej.”

Nes hemi talem se ol vaccine blong ol pikinini blong karem evri manis hemi no posibol tu.

Mrs Rolen hemi stap askem Kavman tru long Ministri blong Helt blong fundem Womal dispenseri wetem wan transport olsem bot blong save helpem hem long Outreach prokram blong helpem ol sikman long ol nara vilej.

By Mika Albie