Ol pipol long Saot Wes Tanna eria kaonsel oli pikimap toti long Lenakel minisipol eria long wik ia olsem pat blong sakses blo Waste Manejmen Woksop trening we oli bin tek pat lem.
Afta long Waste Manejmen trening we i bin tekem ples long Disemba las yia, olgeta mama mo pikinini stat long Bethel vilij kasem Yenara oli pikimap toti wetem stamba tingting blong oltaem kipim taon blong Lenakel mo olgeta respektif komuniti i kiln.
Representatif blong olgeta mama long Saot Wes eria kaonsel, Carol Lop hemi talem se prokram blong klin ap hemi pat long wok blong Waste Manejmen tim we oli kam daon blong helpem setemap olgeta mama tru aot long 7 eria kaonsel.
Long prokram blong dei ia, ol tim blong olgeta mama oli wok blong save hao blong save krieitem o mekem wan samting aot long eni plastik we oli pikimap.
“Wetem olgeta toti we oli manej blong pikimap bai oli tekem i ko bak, mo sam long olgeta komuniti memba blong olgeta bai oli lanem hao nao oli save krieitem wan yusful samting aot long olgeta toti we oli bin pikimap,” Mrs Lop hemi talem.
VBTC nius tim long Tafea provins i toktok wetem Foma Presiten blong Nikoleten kaonsels blong olgeta Jifs, Willie Lop we hemi talem se blong kipim Lenakel taon hemi kiln oltaem hemi duti blong everi citisens blong Tafea province.
Hemi talem moa se evriman i mas wok tugeta wetem lenakel Minisipaliti blong mekem sua se ol pipol mo olgeta visita we oli stap kam insaed long Tanna oli lukim wan sef mo helti ples blong wokabaot mo stap long hem.
By Kency Iati