Fulap international pasenja oli nomo saveh aot long kaontri from Air Vanuatu aircraft Boeing 737 hemi kat technikol problem.
Sam turis mo ol lokol oli se oli no hapi from ol flaet blong olgeta oli kansel mo ikat pua komunikesen long saed blong airline.
Air Vanuatu i kancelem ova long 25 international flaet blong ol pasenja blong Niu Zilan mo Ostralia stat las wik Fridei kasem naoia.
Hem i talem seh oli stap wet blong karem ol spea pat blong plen long Midel East or Europ blong fixim plen.
Air Vanuatu i talem se bae hemi no save ko bak long ol nomal intanasenol flaet blong hem kasem midel blong nekis wik.
Sam long ol pasenja oli ko daon long ofis blong Air Vanuatu stat long Mande wik ia blong fanem aot ol infomesen abaot flaet blong olgeta.
Wayne Preston hemi wan long olgeta pasenja blong Victoria, Australia weh hemi kam long Port Vila long Satete Septemba 16.
Mr Preston hemi sapos blong fly ko bak long Ostralia long Tasdei las wik be flaet blong hem i jenj 3 taem finis.
Hemi kam long Vanuatu blong wan wan weding. Hemi kam wetem wan grup we ikat sam olfala pipol we i nidim sam medikesen mo wan bebe hemi gat six manis nomo.
Mr Preston i talem lo VBTC se hemi mestem birthday blong pikinini blong hem, mo lusem wages blong wok blong hem.
Hemi talem se i no hapi long komunikesen long Air Vanuatu mo hemi no gat gud infomesen long saed blong flaet blong hem.
Air Vanuatu hemi talem se bae oli stat blong re-bukum ol intenasenol flaet long namba 10 Oktoba.
Mo kasem taem ya bae Air Vanuatu hemi provaedem kakai mo ples blong silip long ol pasenja ya kasem taem plen blong hem i stat operet bagegen.
VBTC Nius hemi traem blong karem komen blong olgeta stekholda be oli talem se oli nokat komen blong kivim.
Praem Minister Sato Kilman hem i talem se gavman i kat olgeta plan blong lukluk long airline.
Long Septemba 13, hemi teminetem bod blong Air Vanuatu mo apointem foma praem minista Moana Carcases Kalosil olsem niufala jeaman blong airline.
