Papa blong baby weh oli faenem body blong hem long Vila Central Hospital laundry hemi talem seh hemi putum gud baby blong hem long mortuary beh taem hemi gobak from, baby ia i nomo stap long ples weh oli putum long hem.
Parents blong baby oli confirmem wetem VBTC News se tufala i lusum smol boy blong tufala long hospital taem hemi bon. Igat ol foto mo video weh papa blong baby hemi tekem taem oli stap kavremap gud dead body mo putum inside long mortuary.
Papa ia i talem long VBTC news seh baby ia hemi bon long namba 16 January mo taem oli ready blong gobak long island, ol parents oli faenem aot seh dead body blong baby hemi nomo stap long ples we oli bin putum long hem.
Vanuatu Police Force hemi bin putum aot wan information yesterday folem dead body blong baby we oli faenem long Vila Central Hospital Laundry mo talem se igat investigation i stap go head yet.
Management blong Vila Central Hospital hemi no save kivim any comment yet folem story ya beh VBTC News hemi kasem report se oli rilisim body blong baby igo bak long famili blong hem finis.
Foto: Saplae
