Malampa Pablik Health Manager, Salome Kenneth i talem se hemia i wan bigfala rikod.

Mrs Kenneth i bin stap talem long VBTC Nius se plante araon 11,000 pipol oli tekem fes stik aot long target populasen blong 17,200 mbe seken stik i pua.

Hemi talem se plante oli lisen long ol kiaman nius mo no ko tekem stik.

“Yumi stap luk foto blong ol pipol we oli ron from stik meresin long eli wik ia, long Lakatoro pipol i ron tu from stik,” Mrs Kenneth i talem.

“Pipol i jes fulap nomo long Norsup blong tekem ol seken dos we oli no bin wantem blong tekem fastaem. Fulap pipol tu i kam from ol fes dos blong olgeta.

“Yumi luk se outbreak blong COVID-19 long Port Vila i kosem plante man blong tinkbaot vaccine bageken mo fulap oli kambak blong stik.”

Mrs Kenneth i konfemem tu jata flaet we i tekem ol COVID-19 medivak saplae tul i ko long Malekula long wik ia.

“So ol Personal Protective Equipment, mask, wetem ol rapid antigen test kit,” Mrs Kenneth i talem.

“Yumi nogat eni COVID-19 kes, mifala i bin holem taet sam we oli bin travel aot long hotspot eria long Santo i kam long Malekula, mo oli stap long Precautionari kwarentin naoia. Olgeta ia oli bin travel long ship.

“Naoia mifala i wet long ol risal.”

Mrs Kenneth i askem pipol blong kontinu blong kam mo tekem vaccine.

Hemi talem se vaccination hemi essential seves folem curfew mo i kat ol jek point we ol polis i stap jekem ol pipol wetem kad blong stik.

Mobile tim blong vaccine i stap long Aulua long Saot East Malekula wetem Johnson mo Johnson vaccine mo bae oli kasem lamap long Saot Malekula blong givim ol seken stik long wiken.

Malampa vaccine tim i kasem vinis Ambrym mo Paama wetem Johnson mo Johnson vaccine.