Riot blong New Caledonia i lukim wan inkris long namba blong ded toll blong ova 6 man ova long wiken.
Hemi putum frait long olgeta sitisen mo olgeta forena we oli liv long we from hemi nomo sef.
Wan sos long Noumea, hemi talem se riot i ko daon smol be hemi no save jenjem nomo wanem nao olgeta foto blong Noumea i soem afta long olgeta damej we i stat long las wik ia.
Namba blong ded bambae i save ko antap long eni taem, olgeta pipol i stap long olgeta homes blong olgeta folem stet blong imejensi we franis i diklerem long las wik.
Sos blong VBTC long New Caledonia i ripotem tu se, tete long morning ol pipol i stil save harem nois blong masket, mo smoke i stil kavremap ples.
Ol pipol oli wok insait long ol sto sins long las wik ia kam karem ol smting insait from oli damedjem sto mo putum faea long hem.
Pikfala jalenj blong olgeta nao, hemi long sait blong kakae, we populesen i rilae long hem, mo naoia ol man oli stap sherem nomo kakae wetem ol narafala we oli ran espeseli nao olgeta olfala we oli sik.
Pikfala kampani blong nikel, ol kanak oli blokem i minim se evri nikel sait oli off.
Olgeta kanak oli stap putumaot long sosol media wan chinis we hemi bin sutum 2fala kanak long las wik.
Wan pikfala Dock we hemi blong stokem olgeta meresin blong saplaem raon long kantry ia, oli putum faea long hem bakeken long nait kasem morning ia ful bilding i bon taon.
Wetem semak isuue ia, president blong kaonsel blong ol jif long Port Vila, Jif Theodor Tamana hemi askem ol sistisen blong Vanuatu blong resemap flag blong Kanaky, blong soem se yumi stanap wetem melanesian brata kantri blong yumi long situesen we oli stap long hem naoia.
“Wan man we kat wan flag blong Kanak blong Caledonie, hemi pulum.” Jif Tamana hemi talem.
“Hemi some se hemi sapotem Melanesian brata blong yumi long Caledonie from i kat State of Emergensi hemi stap finis long Caledonie.
“Konsen blong mi olsem wan Melanesian brata, me stap kam ap ia blong mi askem Vanuatu blong yumi mas sapotem brata blong yumi mo sem taem olsem ol family blong yumi oli stap long Caledonie.
“Wokbaot blong mi ia hemi blong mi kamaot blong talemaot se Vanuatu ino slip, Vanuatu i no mas slip, hemi mas wekap.”
Jif Tamana hemi mekem kol ia tete long morning taem hemi stap raon long Port Vila taon blong kivim pablik wan tingting blong helpem ol famili long New Caledonia.
