Afta long wan saksesful tunamen long hom kraon, Vanuatu Futbol Federesen (VFF) Presiden Mr Lambert Maltock hemi kamaot blong talem tankiu i ko bak long olgeta fans se, nomata weh entrens fi hemi ko antap, beh oli saveh manej blong saveh kam watjem ol tim oli ko long aksen .
Maltok hemi presem pikwan olgeta fans, taem i lukim wan gudfala tenaot long taem blong tunamen ia.
“Mi talem tankiu long olgeta fans, se nomata weh mani blong entrens hemi ko antap be oli manej blong kam watjem kem, so mani weh oli karem aot long mani blong entrens hemi, ova long 3 million weh oli spendem blong pem ol pleya, i minim seh hemi samples 200,000VT weh wan pleya hemi karem bifo long faenol,” Mr Maltock I konfemem taem hemi stap toktok wetem VBTC SPORTS.
Hemi poentemaot tu se, mani weh ol pleya oli entaitol long hem ia, hemi no pat wetem ol mani weh oli bin stap risivim long taem blong priperesen blong tunamen ia.
“Hemi wan kompensesen weh mifala i mekem, blong talem long olgeta pleya se sapos oli kasem Semi Faenol mani weh wan pleya hemi kasem hemi 50,000VT taem bambae oli kasem faenol wan pleya bae i karem 100,000VT, hemia hemi difren long trening fi, wan wik hemi 15,000VT, nambatu wik hemi 15,000VT, so ol mani ia tuwods faenol nao hemi kolosap 200,000VT,” Maltok hemi mekem toktok ia blong kliarem sam isu abaot inkris blong mani blong ket mo tu mani blong pem ol pleya blong Vanuatu.
Wetem hemia, VFF Presiden hemi talem tankiu long evriwan blong mekem se yumi hostem wan saksesful tunamen kasem long en blong hem.
“I kat plante tunamen we bae hemi kikoff bakeken, be yumi stap luk fowod tu from wol kap kwalifaea weh bae i stat long Oktoba kasem long Novemba, beh bae mifala i bit bakeken blong wanem Kaontri nao bae hemi hostem, so hemi wan pik tuname tu weh yumi mas pripea from,” Maltok i talem.
Mr Maltok hemi extentem tok tankiu blong hem i ko long olgeta perens mo famili blong olgeta pleya blong save alawem olgeta blong save ripresentem kaontri long wan pikfala tunamen olsem ia, mo tu evriwan weh oli saveh mekem taem blong kam sapotem Vanuatu long taem blong kem.
