Hemi ova long 3 yia nao we wan vilij health woka i stap fulumap meresin long cartong o basket mo wokabaot raon long Etas komuniti blong sevesem ova long 3000 pipol.

Seves ya oli kolem Mobile Seves Klinic mo i no kat propa shelta blong storem ol meresin.

Sins long 2016 kasem naoia, komuniti long Etas i stap usum health post, Mobile Seves Klinic.

Mobile Seves Klinic ia, afta long Cyclone Pam i nokat eni shela o propa aos blong storem meresin kasem naoia.

Linda Tugu hemi vilij health woka long Etas komuniti, mo hemi talem seh hem seves blong hem hemi wokabout aos tu aos, blong kivim meresin long ol man mo i no luk kud.

“Taem aos hemi stap ol man oli kam luk mi stret blong mi kivim seves long olgeta, mi mekem mobile klinik hemi gud beh, i no gud tumas.”

Mrs Tugu hemi kontinu blong talem seh houseing hemi impotan from ol meresin i mas kat wan gudfala storej from hemi pat blong praktisim gud hygin.

“From weh aos hemi nokut i stap, mi nokat inaf mani blong pem wan gud storej blo meresin so mi putum long cartong nomo mo hemi luk nokut.”

VBTC nius hemi toktok wetem kodinata blong ol vilij health woka, long Shefa Health, Mr Erron Sammy, mo hemi kliarem seh blong putum wan shelta long health post hemi responsibilti blong komuniti, olgeta oli lukluk nomo long trainin mo smol vatu blong olgeta.

“Yumi undastan seh wan komuniti hemi wan krup blong ol pipol weh oli slip tugeta mo helpem ij wan, hemi impoten blong umi kam tugeta long wan ting ting blong help impruvum health blong yumi.”

Wan representitiv blong jif hemi talem seh i luk strakol blong Linda blong sevesem medicin raon long vilij, mo komuniti i mas step up blong help moa, mo hemi askem help long kavman sekta from health hemi bisnis blong evriman

“Everi dei mo naet Linda i mas aot blong wokabaot mo sevesem full pipol blong Etas, hemi no luk kud, hemi gud sipos kavman i luk saveh nid blong ol pipol long rurol eria long saet blong health sekta.”

Komuiti tu oli talem seh bae komuniti hemi had yet blong kam tugeta mo help mo oli aksem help long kavman.

Wan lokol hemi seh “storej blong ol meresin hemi no kud from i fraet lukaot wan pikinini hemi saveh karem aot mo kakai”

VBTC nius hemi traem blong kasem head jif blong Etas beh i no posibol.