Ova 100 health wokman oli stap wok kolosap wetem ol nara franlaen wokman blong stopem spread blong COVID.
VBTC Nius i toktok long tu health woka taem tufala i kam blong mekem COVID test long ol staff blong VBTC i no longtaem.
Leisal Iman, Nurse long Maternal and Child Health long George Pompidou, i bin help long taem blong ol repatriation sins stat blong January.
Mr Iman i talem se hemi no bin kobak hom mo hemi wan manis nao.
“Hemi rili jalenjing taem mifala i leko famili mo ko stap wok mo ol pikinini i stap ring blong wantem mifala i kobak,”Mrs Iman i talem.
“Mbe mifala i tinktink strong blong kontenem sik ia long kwarentin blong i no kamaot long komuniti mbe sam hao i kamaot.
Mrs Iman i talem se hemi no isi from sam klos fren oli kasem COVID mo oli mas ko long kwarentin bifo oli aot blong wok bakeken.
Hemi talem se taem oli ko long haos oli spendem wan dei nomo wetem ol famili mo i no enaf taem.
Esthel Baniel, nara health woka i talem se hemi glad blong sevem kaontri mbe hemi wantem se ol samting i kobak nomol.
“Seves we mifala i stap provaedem ia i mas blong givim aot,” Hemi talem.
Most long ol helt workers we oli stap naoia oli mas leko ol work we oli mekem blong helpem work blong stopem covid-19. Plante oli serve long quarantine sites, isolesen sites, oli mekem testing mo vaksin.
Memba blong Non-Government Organisation, Foundation for the betterment of Society, Henry Tamashiro i talem se oli oltaem prea blong ol olgeta mo oli mas strong oltaem long wok.
