Malvatumauri Council blong olgeta Jif bae hemi mekem ofisol opening blong niufala Nakamal blong hem long namba 5 March 2025. Program ya bae hemi stap long 3 dei, stat long namba 3 March wetem wan spesel tok tankyu long olgeta we oli givhan blong bildim Nakamal ya, mo entertainment long namba 4 March, mo bigfala seremoni blong opening long 5 March.
CEO blong Malvatumauri, Jif Jean Pierre Tom, i talem se “President blong Malvatumauri i wantem talem bigfala tok tankyu i go long evriwan we oli mekem wok ya i kamtru long namba 3 mo long namba 4 March, yumi gat entertainment, mo long namba 5 March bai yumi mekem wan ofisol seremoni bitwin President blong Malvatumauri mo Kavman.”
Long selebresen ya, bae i gat kastom danis, stringband mo ol tradisenol seremoni blong soem kastom mo kalja blong Vanuatu.
Jif Tom i talem tu se, “afta long ol challenge we kantri hemi go tru long hem long las yia, taem ya hemi taem blong yumi kam tugeta mo mekem niufala stat blong 2025 wetem hop mo strong tingting.”
“Yumi bin pas tru long plante samting long Disemba, be kantri blong yumi i stap yet mo yumi no save letem ol problem ya i holem yumi back. I gud yumi statem yia ya wetem wan selebresen mo wok tugeta wetem niufala kavman blong mekem 2025 i wan yia blong ol gudfala achievement.”
