Wan long ol bigfala musik konset long yia ia – UB40 wetem Ali Campbell hemi statem ol sel blong tikets blem noaia long VBTC ofis long Port Vila.
E kat 2 tiket praes weh hemi Platinum blong 10,000 vatu mo Gol tiket blong 3000 vatu.
VBTC olsem mein hos blong event ia hemi stap mekem ol preperesen blem naoia long Korman Stadium olsem venue blong show ia.
Hed blong Content long VBTC, Moses Cakau hemi tokbaot moa long saed blong tiket.
“Ol platinum tiket i kat access blong purchasem ol beverages and access tu blong pem ol kakae weh i stap on sale long bar long platinum section,” hemi talem
Hemi talem moa se behaen long platinum section hemi ples blong gol tiket mo olgeta save kat akses long kakae mo kava long behaen.
“Fulap man oli stap hariap blong karem ticket blong ol and mifala stap luk fowod blong hostem konset ia.”
Ol tiket oli stap on sel tudei, oli limited nomo minse pa save finis mo ol pipol weh oli interes blo waj oli mas kam pem kwiktaem.
UB40 wetem Ali Campbell hemi wan popula musik band blong bifo weh stap ple ol reggae mo pop musik, band ia hemi stat long Desemba 1978, mo hemi stap pefom blong 46 yia nao.
Ali Campbell hemi lid singa blong UB40 band fastaem bifo hemi aot long 2008 beh hemi bin kobak blong joenem band long 2013.
Bae popula singa ia pa kam ple tugeta wetem 4 band memba blong UB40 mo yumi kat 5 wiks nomo i stap bifo bigfala musik konset ia bae tekem ples long Korman Stadium long Port Vila.
