I gat sam studen oli bin toktok blong talem se hemi wan gudfala samting blong mekem straek blong ol tija, mbe hemi gat fulap studen we oli talem se olgeta nao, bae oli karem effekt blong straek ya.

Straek we hemi bin annaons long las wik hemi tekem effekt mo hemi lukim fulap skul oli klos.

i gat sam skul we oli stil operet smol yet wetem ol tija we oli no pat blong Vanuatu Tija Union.

VBTC i bin visitim olgeta skul blong Malapoa, Vila North, Lycee, Vila East, Central, mo Pango French skul, mo i lukim fulap studen hemi no bin kam in long skul.

Long Malapoa, VBTC i bin toktok wetem wan tija, mo i lanem se olgeta tija oli stap weit yet long ol oda o direktiv, blong olgeta i save se bae oli straek o no.

Long Vila North, Central, mo Pango french skul hemi lukim skul hemi emti mo ol studen oli no kam in.

Mo long Vila East, hemi lukim sam studen oli stap long class, mbe i nogat eni lesen mbae tekem ples.

Wan studen long Vila East skul, name blong hem hemi, Agnes Kalsal, hemi bin tlem se straek ya hemi save affektem nogud ol studen.

“Taem olgeta i straek olsem, bae save mekem mifala feil bigwan, bae mifala no save kaj ap long wok blong mifala, from olgeta ya nao bae givim save long mifala.”

Long semak kwesten, VBTC i bin toktok wetem wan yia 13 studen, mo hemi talem se hemi lukim straek ya se hemi wan gud samting mo wan nogud samting blong mekem naoia.

“Long tingting blong mi, mi inbitwin long sapot blong straek, from long saed blong ol tija, from olgeta i nidim, mo long wok we olgeta i mekem i no pay off, be wael wanem we oli mekem hemi gud, be long saed blong mifala ol studen, hemi nogud from mifala i nidim sapot blong olgeta.”

Wan foma memba blong Palemen, mo semtaem mos senia trei unionis long kantri, Ephraim Kalsakau, we hemi wan man we i stap pem skul fee blong ol apu blong hem, i talem se i mas gat sam samting i stap blong save helpem ol studen afta we ol isu ya i resolf.

“Mi olsem wan apu we i stap pem skul fee blong wan apu, personeli nod olsem wan treot unionis, mi save talem se yia ya, bae skul i mas kasem Decemba 31 blong kavarem taem we hemi lus, as an individual we hemi konsen long ol pikinini, yumi faenem wan wei blong helpem ol pikinini.” 

Olgeta skul long Vila we hemi on strike naoia hemi stap weit long respons blong gavman wael oli plannem nekis wokbaot blong ol.